Features and benefits of Windows 10 Enterprise LTSC


သူများတကာတွေ Windows 10 သုံးနေကြတာတွေ့လို့ ကိုယ့် ကွန်ပျူတာကိုလည်း Windows 10 ပြောင်းသုံး ရင်ကောင်းမလားဆိုပြီး တွေးနေမိသလား။
Windows 10 ကိုသုံးချင်ပေမယ့် တကယ်တမ်း အသုံးချရမယ့်အချိန်မှာ စက်ရဲ့ Hardware Requirements က နိမ့်လို့ Performance မကောင်းမှာမျိုး စိုးရိမ်နေသလား။
လက်ရှိ Windows 10 သုံးနေပေမယ့် အရင်သုံးခဲ့ဖူးတဲ့ Windows (Windows 8.1, 8, 7) တွေလို သွက်သွက် လက်လက်မရှိဘဲ နှေးကွေးလေးလံနေတယ်လို့ ခံစားနေရသလား။
ကိုယ်လည်း အမှန်တကယ်သုံးဖြစ်တာမဟုတ်ဘဲ မလိုဘဲထည့်ထားတဲ့ Applications တွေ Windows 10 မှာ ပိုများနေတယ်လို့ ခံစားနေရသလား။
သုံးချင်တာက Windows 10 Pro -  ဒါပေမယ့် စက်ရဲ့ Performance မနိုင်မနင်းဖြစ်မှာစိုးလို့ Windows 10 Home/Basic လောက်ကိုဆင်းပြီး အဝေးတစ်နေရာကနေ Pro Features တွေ ငါ့စက်က ဘယ်တော့မှ သုံးနိုင်မှာပါလိမ့်လို့ ကျိတ်မနိုင်ခဲမရဖြစ်နေသလား။
…… သလား
….... သလား
…… သလား။
ကွန်ပျူတာနဲ့ ရင်းနှီးသူအများစု ခုနောက်ပိုင်းမှာ Windows 10 ကို ရင်းနှီးနေကြပါပြီ။ ဒါပေမယ့် မြန်မာနိုင်ငံက ကွန်ပျူတာ အသုံးပြုသူအများစုရဲ့ စိတ်ထဲမှာတော့ Windows 10 ကို Windows 7 နဲ့ Windows 8.1 တို့လောက် ကျေနပ်မှု မရနိုင်ကြသေးဘူးလို့ ယူဆရပါတယ်။ ဘာကြောင့်လဲဆိုရင် မြန်မာဖောင့်တွေနဲ့ ပတ်သက်ပြီး တချို့ သော အဆင်မပြေကြသူ အများစုက Negative Feedback ပေးကြတာ၊ Microsoft ကနေ ထုတ်တဲ့ နောက်ဆုံး OS ဖြစ်တာကြောင့် Hardware Requirements တောင်းတာ များလာတာ၊ Graphic Cards ကောင်းကောင်း ကန်းကန်းမပါရင် သုံးဖို့အဆင်မပြေတာ၊ လက်ရှိရင်းနှီးပြီးသား Interface တစ်ခုကနေ နောက်တစ်ခုကို ပြောင်းလဲ ဖို့ စိန်ခေါ်မှုကို ရင်မဆိုင်ချင်တာ အစရှိသဖြင့် အ​ခြေအနေအမျိုးမျိုး ဖြစ်နိုင်ပါတယ်။
ကျွန်တော်ကိုယ်တိုင်လည်း Windows 10 ကို စထွက်စဉ်ကတည်းက တစိုက်မတ်မတ် သုံးချင်ခဲ့ပေမယ့် အပေါ်မှာ ပြောခဲ့တဲ့ အချက်တွေကြောင့် Windows 10 သုံးနေရာကနေ မကြာခဏ Windows 8.1 ကို ပြန်ဆင်းဆင်းပြီး သုံးခဲ့ရပါတယ်။ Windows 10 သုံးချိန်မှာ ကျွန်တော့်အတွက် အဓိက အဆင်မပြေတဲ့ ပြဿနာကတော့ Graphics ပြဿနာပါ။ ပုံမှန်အမြဲသုံးနေရတဲ့ AutoCAD, Sketchup, Solidworks, Siemens NX တွေဆိုရင် Windows 10 Pro နဲ့ တွဲသုံးချိန်မှာ Graphics မနိုင်မနင်းဖြစ်ပြီး အလုပ်လုပ်ရတာ အဆင်မပြေ ဖြစ်ရပါတယ်။ Office ဆိုရင်လည်း 2016, 2019 သုံးရင် ကျွန်တော့်စက်က Hang ပါတယ်။ Windows 10 Pro ကို မနိုင်လို့ ဖြစ်မယ်ဆိုပြီး Windows 10 Home အထိ ဆင်းသုံးဖူးပါတယ်။ အဆင်မပြေခဲ့ပါဘူး။
နောက်ဆုံးမှာ ကျွန်တော် အဖြေတစ်ခု ရှာတွေ့ခဲ့ပါတယ်။ အဲ့အတွက်လည်း ဒီအကြောင်းကို ရေးဖြစ်တာပါ။ Windows 10 သုံးပေမယ့် ကျွန်တော့်လို စိတ်တိုင်းမကျ ဖြစ်နေသူတွေ၊ အပေါ်ဆုံးမှာ မေးခဲ့တဲ့ မေးခွန်းတွေနဲ့ ကိုက်ညီနေသူတွေ ဒီနည်းကို စမ်းသပ်ကြည့်ပါ။
အဖြေကတစ်ခုတည်းပါ။
လက်ရှိသုံးနေတဲ့ Windows 10 အစား Windows 10 Enterprise LTSC Version (Long-Term Servicing Channel) ကို ပြောင်းသုံးကြည့်ပါ။
Windows 10 Enterprise LTSC version ဆိုတာ တော်တော်များများ မကြားဖူး မရင်းနှီးကြပါဘူး။ အများစုက Windows 10 Pro/Enterprise လောက်ကိုပဲ အသုံးများပြီး ကြားဖူးကြပါတယ်။ ပုံမှန်လူသုံးများတဲ့ Windows 10 Pro/Enterprise တွေမှာ တကယ်တော့ လူကြိုက်သိပ်မများတဲ့ (လူသိပ်မသုံးတဲ့) Built-in Apps တွေ (ဥပမာ အနေနဲ့ ပြောရရင် Stores, Edge browser, Maps, Cortana, .) စတဲ့ Metro Apps တွေ၊ Games တွေ အတော်များများ ပါဝင်နေပါတယ်။ အဲ့တာတွေအပြင် ဘာမှမပြုမပြင်ပဲ ဆိုင်ကတင်ပေးလိုက်တဲ့အတိုင်း သုံးတဲ့ အခါ Background Processes အရမ်းများပြီး System Resources အတော်ပေးရသလို၊ ပုံမှန်အများစု သိပ်သတိမထားမိကြဘဲ နေရာပေးထားရတဲ့ Apps တွေလည်း Windows 10 မှာ တော်တော်များများ ပါဝင်နေပါတယ်။ အဲ့ Apps တွေထဲက တချို့ကို အလွယ်တကူ ဖြုတ်ပစ်လို့ရပေမယ့် တချို့ကတော့ ဖြုတ်ပစ်ဖို့မလွယ်ပါဘူး။
အဆိုးဆုံးပြဿနာကတော့ အင်တာနက်ချိတ်ပြီး သုံးလေ့ရှိတဲ့ စက်တွေမှာ Windows 10 တင်ထားရင် User ဆီကနေ ခွင့်ပြုချက်မတောင်းဘဲ သူ့ဘာသာ မကြာခဏ Updates တွေ ဒေါင်းလုပ်ချပြီး နောက်ကွယ်ကနေ Install လုပ်နေတဲ့ ပြဿနာပါ။ Windows 10 ကို လူမုန်းများကြတဲ့ အချက်တွေထဲမှာ Windows Updates ကို  ပိတ်ဖို့မလွယ်တဲ့အချက်ကလည်း တစ်ခုအပါအဝင်ဖြစ်ပါတယ်။ Windows 10 မှာ စထွက်ကတည်းကနေ လက်ရှိအချိန်ထိ ထုတ်ထားပြီးတဲ့ Updates တွေက အောက်မှာ ဖော်ပြထားတဲ့အတိုင်း ဖြစ်ပါတယ်-
  1. Windows 10 November Update (version 1511) (codename Threshold 2 or TH2)
  2. Windows 10 Anniversary Update (version 1607) (codename Redstone 1 or RS1)
  3. Windows 10 Creators Update (version 1703) (codename Redstone 2 or RS2)
  4. Windows 10 Fall Creators Update (version 1709) (codename Redstone 3 or RS3)
  5. Windows 10 April 2018 Update (version 1803) (codename Redstone 4 or RS4)
  6. Windows 10 October 2018 Update (version 1809) (codename Redstone 5 or RS5)
အဲ့တာကြောင့် Windows 10 ချင်းတူပေမယ့် ကိုယ့်စက်မှာ တင်ထားတဲ့ Windows 10 ဟာ ထိပ်ဆုံးက Version 1511 များ ဖြစ်နေခဲ့မယ်ဆိုရင် နောက်ဆုံး Version 1809 ဒေါင်းလုပ်ချပြီး Install လုပ်လို့မပြီးမချင်းနောက်ကွယ် ကနေ ဒီ Windows Updates က Run နေမှာပါ။ Windows 10 Automatic Updates ကို ပြင်ဆင်ဖို့အတွက် နည်းလမ်းတချို့ ရှိသလို ခုနောက်ထွက်မယ့် Windows 10 May 2019 Update မှာလည်း အဲ့ဒီ့ချို့ယွင်းချက်ကို ပြင်ဆင်သွားမယ်လို့ Microsoft က ဆိုထားပါတယ်။ ဒါပေမယ့် အဲ့ဒီ့အခြေအနေကို မရောက်လာမချင်း End Users တွေအတွက်တော့ Windows Updates နဲ့ ပတ်သက်ပြီး စိတ်ရှုပ်စရာတွေ ရှိနေရဦးမှာပါ။

What is Windows 10 Enterprise LTSC Version?
Windows 10 Enterprise LTSC ဆိုတာ အကြီးစား စီးပွားရေးလုပ်ငန်းတွေနဲ့ အလယ်အလတ်တန်းစား စီးပွားရေး လုပ်ငန်းတွေမှာ အသုံးပြုကြတဲ့ ကွန်ပျူတာတွေအတွက် New Features တွေကို ဦးစားမပေးဘဲ Stable ဖြစ်ဖို့ ဦးစားပေး ဖန်တီးထားတဲ့ Enterprise Version တစ်ခု ဖြစ်ပါတယ်။ သူ့ရဲ့ အားသာချက်တွေ ကတော့-
  • မဖြစ်မနေလိုတဲ့ Security Updates အနည်းအကျဉ်း Install လုပ်တာကလွဲရင် ပုံမှန် Windows 10 တွေမှာလို Updates ပြဿနာလုံးဝမရှိဘဲ Long-term support ပေးပါတယ်။
  • ၂ နှစ် သို့မဟုတ် ၃ နှစ်ခြားမှ တစ်ခါသာ Major Release ထွက်ပြီး ထွက်တဲ့ Release တစ်ခုချင်းစီတိုင်းကလည်း Security Updates ကို ၁၀ နှစ်ထိ ပံ့ပိုးပေးပါတယ်။
  • Windows 10 Enterprise LTSC မှာ အများစု မကြိုက်(မသုံးဖြစ်ကြတဲ့) Store Apps တွေ၊ Edge Browser၊ Cortana စတာတွေ မပါသလို Windows Store ကိုပါ ထည့်မထားပါဘူး။
  • အသုံးပြုသူရဲ့ သတင်းအချက်အလက်တွေကို စုဆောင်းတဲ့ Telemetry နဲ့ ဆက်စပ်နေတဲ့ Services တွေကိုလည်း Windows 10 Enterprise LTSC မှာ အားလုံးနီးပါး အပြီးပိတ်ထားလို့ရပါတယ်။
  • မလိုလားတဲ့ Apps တွေနည်းတဲ့အတွက်တော့ System Resources အသုံးပြုမှုလည်းနည်းပြီး ပုံမှန် Hardware Requirements နိမ့်တဲ့ စက်တွေမှာတောင် Windows 10 ကို ပေါ့ပေါ့ပါးပါး သုံးနိုင်တာတွေ့ရပါတယ်။
  • Updates တွေ ခဏခဏ ဒေါင်းလုပ်ချပြီး Install လုပ်နေတာမျိုး မရှိလို့ System က Stable ဖြစ်ပြီး Performance လည်း အတော်လေး ကောင်းလာတာတွေ့ရပါတယ်။
  • ကျွန်တော်အကြိုက်ဆုံး အချက်တစ်ခုကတော့ Graphics သုံးရတဲ့ Apps တွေကို တခြား Windows 10 တွေနဲ့ မတူပဲ ပေါ့ပေါ့ပါးပါး သုံးနိုင်တဲ့အချက်ပါ။
အဲ့တာတွေကြောင့်မို့ Stable ဖြစ်တဲ့ Windows 10 ကို ပေ့ါပေါ့ပါးပါး သုံးချင်သူတွေအတွက် တခြားတခြားသော Windows 10 Versions တွေထက် Windows 10 Enterprise LTSC ကို ပြောင်းသုံးဖို့ ကျွန်တော် အကြံ ပေးချင်ပါတယ်။ တစ်ခုသိထားဖို့လိုတာ Windows 10 Enterprise LTSC သည် ပုံမှန် Windows Users တွေအတွက် တရားဝင်ရောင်းတဲ့ OS မဟုတ်လို့ ရန်ကုန်မှာရှိတဲ့ Computer ခွေအရောင်းဆိုင်တွေမှာ ရနိုင်ဖို့ မသေချာပါဘူး။ Windows 10 Enterprise LTSC ဆိုတာကို သိချင်မှတောင် သိပါလိမ့်မယ်။ ဒါဆို Windows 10 Enterprise LTSC ကို ဘယ်မှာရှာလို့ရနိုင်မလဲ။
ဟုတ်ကဲ့။ အင်တာနက်ရှိရင် အလွယ်တကူ ဒေါင်းလုပ်ချလို့ရတဲ့ နေရာတွေရှိပါတယ်။ ခုနောက်ဆုံးထွက်ထားတဲ့ Windows 10 Enterprise LTSC 2019 Build 17763.437 (Updated Apr. 2019) x86 / x64 ဆိုရင်  ဒီနေရာမှာ တွေ့မိပါတယ်။
ဒီလိုတွေပြောခဲ့လို့ Windows 10 Enterprise LTSC က အားနည်းချက်တွေ မရှိတော့ဘူးလား …
ဒီလိုတော့လည်း မဟုတ်ပါဘူး သူ့မှာလည်း  စဉ်းစားစရာလေးတွေ တော့ ရှိပါသေးတယ်။ ဒါတွေပြောနေရင် ရှည်ကုန်မှာစိုးလို့ ဒီလောက်နဲ့ပဲ နားလိုက်ပါဦးမယ်။

Windows 10 & Myanmar Fonts (Unicode + Non-Unicode) Installation Guide

2016-02-07_131112

Windows 10, Myanmar Fonts and Configuration Settings Review ဆိုပြီး ၂၀၁၄ ခုနှစ် Windows 10 ပေါ်ခါစတုန်းက စရေးဖြစ်ခဲ့တယ်။ ဒါပေမယ့် အဲ့နောက်ပိုင်း ဘလော့ကို ပုံစံပြင်ရုံကလွဲပြီး ဘာမှမလုပ်ဖြစ်၊ စာလည်း မရေးဖြစ်ခဲ့တာ တစ်နှစ်တောင် ကျော်ခဲ့ပြီပေါ့။ မှတ်မှတ်ရရ ၂၀၁၅ ခုနှစ်ထဲမှာ ဘာတစ်ခုမှကို မရေးဖြစ်ခဲ့ဘူး။ အဲ့နောက်ပိုင်း Windows 10 ကို တင်လိုက်ချလိုက်၊ Virtual နဲ့စမ်းလိုက်တော့ လုပ်ဖြစ်တယ်။ အဲ့လိုစမ်းဖြစ်ရခြင်းရဲ့ အဓိကရည်ရွယ်ချက်က ရုံးသုံးအဖြစ် အခုနောက်ပိုင်း အတော်နေရာရလာတဲ့ မြန်မာယူနီကုတ်နဲ့ အဆင်ပြေ/မပြေဆိုတာရယ်၊ ရုံးသုံးမဟုတ်ပေမယ့် အင်တာနက် စာမျက်နှာ အများစုမှာ အသုံးများတဲ့ ဇော်ဂျီနဲ့ အဆင်ပြေ/မပြေ သိချင်တာရယ်၊ Non-Unicode Fonts တွေ ဆက်သုံးလို့ ဖြစ်/မဖြစ်ဆိုတာရယ် သိချင်တာကြောင့်ပါ။

Windows 10, Myanmar Fonts and Configuration Settings Review


Windows 10 ကို Virtual Box နဲ့ စမ်းသုံးကြည့်လိုက်တော့ အမြင်အားဖြင့် ဘာမှ သိပ်ထူးခြားမှု မရှိသလို ထင်ရပေမယ့် လက်တွေ့မှာ အပြောင်းအလဲ အတော်များများ ပြုလုပ်ထားတာ တွေ့လာရတယ်။ ဝင်းဒိုးထဲစဝင်ဝင်ချင်းမှာ ပထမဆုံး သတိထားမိတာက Start Menu - သိရသလောက် Desktop နဲ့ Laptop Users အများစုက Charms Bar နဲ့ Start Menu Screen ကို သဘောမကျကြဘူး။ လှသလိုလို ခံစားရပေမယ့် Touch-Enabled Devices မဟုတ်လို့ ထင်သလောက် အသုံးမတဲ့ဘူးလို့ ယူဆလို့ရတယ်။ ဒါကို မိုက်ကရိုဆော့ဖ်ကလည်း လက်ခံတယ်။ နောက်လာမယ့် Windows 10 Final Version မှာ Charms Bar က Touch-Enabled Devices တွေကလွဲရင် ပါလာမှာ မဟုတ်တော့ဘူး။ Start Menu Screen ကတော့ "Taskbar and Start Menu Properties" Dialog Box အောက်က "Start Menu" Tab အောက်မှာရှိတဲ့ "Use the Start menu insted of the Start Screen" ကို Deselect လုပ်ပေးလိုက်ရင် အရင်လို ပြန်ရပါတယ်။


ပြီးတော့ Restart နဲ့ Shut Down ကလည်း အရင်တုန်းကထက်စာရင် Access လုပ်ဖို့ အများကြီး လွယ်ကူသွားပြီ။ အိမ်မှာ တစ်လခြား တစ်ခါလောက် ဝင်းဒိုးပြောင်းတင်လေ့ရှိတော့ Windows 8 တင်တိုင်း အိမ်ကမိန်းမနဲ့ အမြဲပြဿနာ တက်ရတယ်။ သူက Restart နဲ့ Shut Down ဘယ်နားရှိတယ်ဆိုတာ မရှာတတ်ဘူး။ နောက်ပိုင်း သင်ပေးလို့ သုံးတတ်သွားပေမယ့် Windows 8 တို့ 8.1 တို့ဆို သူအာရုံ သိပ်မလာတာ ကျွန်တော် သတိထားမိတယ်။ ခုတိုင်းဆို Windows 10 မှာတော့ အာရုံပြန်လာမယ့် သဘောရှိတယ်။


နောက်ပြီး ဝင်းဒိုးထဲ စရောက်ရောက်ခြင်းမှာ တစ်ခြား ဘာမှ လိုက်မကြည့်ပဲ  မြန်မာဘာသာနဲ့ ပြောင်းသုံးလို့ ရမရ ပထမဆုံး သွားကြည့်ဖြစ်တယ်။ အဖြေကတော့ လက်ရှိအချိန်ထိ "No" ပါ။ အရင် Windows 8 မှာတုန်းကတော့ Windows စတင်တင်ချင်း Keyboard or Input Method မှာ Myanmar ဆိုပြီး ရွေးစရာပါလာတာ သတိထားမိတယ်။ စမ်းလည်း စမ်းကြည့်ခဲ့ဖူးတယ်။ အဲ့လိုတင်လိုက်ရင် မြန်မာလက်ကွက်နဲ့ Keyboard တစ်ခုပါလာပေမယ့် လက်တွေ့သုံးကြည့်တဲ့အခါ တစ်ခြား မြန်မာကီးဘုတ်တွေ ထပ်တင်ရင် Conflict ဖြစ်နေတဲ့ အနေအထားမျိုး တွေ့ရတယ်။ ကိုယ့်စက်တစ်ခုတည်း ဖြစ်တာလားတော့ မပြောတတ်ဘူး။ အခုလည်း Windows 10 မှာ Myanmar Fonts ဆိုလို့ Myanmar Text ဆိုတဲ့ ဖောင့်တစ်မျိုးတည်းကိုပဲ Regular နဲ့ Bold ဆိုပြီး ၂ မျိုးခွဲ ထည့်ပေးထားတာ တွေ့ရတယ်။ အဲ့တာကိုတော့ အားမရဘူး။


နောက်ထပ် စပ်စုမိတာတစ်ခုက အရင် x32-bit Windows တွေမှာ မြန်မာဖောင့်နဲ့ ပတ်သတ်ပြီး ပြဿနာ မရှိခဲ့ဘူး။ မြန်မာလိုမြင်ချင် မြန်မာလိုရိုက်ချင်ရင် သုံးနေကျ Alpha Zawgyi Version 2.0.0.12 သုံးလိုက်ရင် အားလုံးအဆင်ပြေသွားတယ်။ ဒါပေမယ့် x64-bit ကိုပြောင်းသုံးတော့ ကီးဘုတ်က အဆင်ပြေပေမယ့် တချို့ Apps တွေမှာ မြန်မာလို ကောင်းကောင်းမပေါ်တာ တွေ့လာရတယ်။ ဒါပေမယ့် Windows 7 x64-bit အထိ အဲ့တာက ပြဿနာ မဟုတ်သေးဘူး။ ဘာလို့လည်းဆိုတော့ Personalization အောက်က Window Color and Apperence ကို ဝင်လိုက်ရင် Advanced Apperance Settings ဆိုတာရှိတယ်။ အဲ့မှာ Item တစ်ခုချင်းစီကို လိုချင်တဲ့ Font ပြောင်းလို့ရတယ်။ ဒီလောက် အဆင်ပြေနေတဲ့ Apperance Settings က Windows 8 နဲ့ 8.1 လည်း ရောက်ရော ဘယ်နားရောက်သွားမှန်း မသိတော့ဘူး။ အဲ့ဒီ့ Advanced Apperance Settings မပါတာက x32-bit Windows မှာ Alpha Zawgyi Version 2.0.0.12 ရှိနေလို့ ပြဿနာ မဟုတ်ပေမယ့် x64-bit ကိုလည်း ပြောင်းရော အဆင်မပြေတော့ဘူး။ ဒီပြဿနာတွေ ပြေလည်ဖို့ Advanced Apperance Settings များ Windows 10 မှာ ပြန်ပါမလားဆိုပြီး ရှာကြည့်မိတယ်။ လက်ရှိ Windows 10 Technical Preview မှာ ပါမလာသေးတာတော့ သေချာသွားပါပြီ။ Final မှာ ပြန်ပါလာနိုင်မလား ဒါကိုတော့ စောင့်ကြည့်ရဦးမယ်။


နောက်ထပ်ထူးခြားတာတွေကတော့ အရင်က သီးခြားစီဖြစ်နေတဲ့ Metro / Modern / Universal / Windows Store Apps တွေ အခုဆို Desktop ပေါ်မှာ Run နိုင်နေပြီ။ နောက်ပြီး Linux မှာ ရှေးပဝေသဏီတည်းက သုံးလို့ရတဲ့ Virtual Desktops အခု Windows မှာလည်း သုံးနိုင်ပြီ။ နောက် Command Prompt မှာလည်း အများကြီး ပြောင်းလဲမှုလုပ်ထားတာ တွေ့ရတယ်။ အဲ့တာကိုတော့ နောက်မှ ထပ်ရေးဦးမယ်။

TechSectors.

Download Windows 10 Technical Preview



၂၀၁၄ အောက်တိုဘာ ၁ ရက်နေ့မှာ အရင်တုန်းက Windows 9 ထွက်မယ်လို့ နာမည်ကြီးနေရာကနေ Microsoft က Windows 10 Technical Preview ဆိုပြီး မိတ်ဆက်လိုက်တယ်။ အဲ့တာကိုတော့ အကျယ်မချဲ့တော့ဘူး။ အားလုံးလည်း သိပြီး လောက်ပြီ။ မြန်မာနိုင်ငံမှာတောင် အင်တာနက်ဂျာနယ်ထဲ ပါတာ တွေ့မိသေးတယ်။

ကိုယ်တိုင် စမ်းကြည့်ချင်လို့ တစ်နေ့က ဒေါင်းလုပ်ချပြီး ဒီနေ့မှ စစမ်းဖြစ်တယ်။ ဘာထူးသလဲဆိုတော့ ဘာမှတော့ သိပ်မထူးသေးဘူး ထင်တယ်။ Windows 8.1 လိုပဲ။ နည်းနည်း ထူးသွားတာ သိပ်အသုံးမတည့်တဲ့ Charms Bar ပျောက်သွားတယ်။ သိရသလောက်တော့ လာမယ့် Windows 10 မှာ Desktop နဲ့ Laptop Users တွေအတွက် Charms bar ပါမှာ မဟုတ်တော့ဘူး။ Charms bar ကို Touch-Enabled Devices တွေမှာပဲ ထည့်သွင်းသွားမယ်လို့ ပြောတာ တွေ့ရတယ်။ နောက်ပြီး Brand New Start Menu ပါလာတယ်။ ပိုပြီး သုံးလို့ အဆင်ပြေသွားတယ်။


ကော်နက်ရှင် ကောင်းသူများ Windows 10 Technical Preview စမ်းသုံးချင်တယ်ဆိုရင် ဒီနေရာကနေ ဒေါင်းလုပ်ချနိုင်တယ်။ Technical Preview က အလကားပေးတယ် ဆိုပေမယ့် သူ့ကို ဒေါင်းလုပ်ချဖို့အတွက် Windows Insider Program မှာ အရင်ဆုံး Sign Up လုပ်ဖို့ လိုတယ်။ နောက်ပြီး Preview Version က 32-bit (x86) က 2.9GB လောက်ရှိပြီး 64-bit (x64) က 3.8GB လောက်ရှိတယ်။



ဒေါင်းလုပ်ချဖို့ အဆင်ပြေအောင် Direct Download Links တွေ စုပေးထားတယ်။

English (64-bit) | English (32-bit)
English (United Kingdom) (64-bit) | English (United Kingdom) (32-bit)
Chinese (Simplified) (64-bit) | Chinese (Simplified) (32-bit)
Portuguese (Brazil) (64-bit) | Portuguese (Brazil) (32-bit)

Product Key လည်း အောက်မှာ ပေးထားတယ်။
NKJFK-GPHP7-G8C3J-P6JXR-HQRJR
ကျွန်တော်တို့ တစ်ခုသိထားရမှာ ဒါ Final Version မဟုတ်ဘူး။ စမ်းသုံးကြည့်ပြီး အဆင်မပြေတာတွေကို Feed Back ပြန်ပေးနိုင်အောင် သုံးခိုင်းထားတာ။ အဲ့တာကြောင့် Dual-Boot သုံးချင်လည်း ဖြစ်တယ်။ Virtualization Software နဲ့ သုံးမယ်ဆိုလည်း ကောင်းတယ်။ နဂိုကောင်းနေတဲ့ ဝင်းဒိုးကို ဖျက်ပြီး ဒီ Windows 10 Technical Preview ကိုတော့ အဓိကထား မသုံးစေချင်ဘူး။ နောက်ပြီး Windows 10 Technical Preview က April 15, 2015 မှာ Expire ဖြစ်မယ်။ နောက်ပြီး Windows 10 Technical Preview ရဲ့ System Requirements က Windows 8.1 အတိုင်းပဲ။ 

TechSectors.

How To Get Windows Experience Index In Windows 8.1

Windows Experience Index ဆိုတာ Windows Vista - 7 နဲ့ 8 သုံးသူတွေ အတွက် Windows တင်အပြီးမှာ ကိုယ့်စက်ရဲ့ System Performance ဘယ်လောက် ရှိသလဲ ဆိုတာ စစ်ဆေးနိုင်တဲ့ ညွှန်းကိန်းကိုခေါ်ပါတယ်။ အလွယ်ပြောရင် Run လို့ ရလာတဲ့ Result ကို ကြည့်ပြီး Performance အတွက် ဘာတွေတိုးရမယ်၊ ဘာတွေချွေသုံးရမယ်၊ ဒီ Windows ကို ဆက်ပြီး သုံးသင့်သလား၊ မသုံးသင့်ဘူးလား ဆိုတာမျိုးတွေထိ ခန့်မှန်းဆုံးဖြတ်နိုင်ပါတယ်။

Windows Experience Index အကြောင်းကို အသေးထပ်စိတ်ပြီး ရှင်းရရင် သူက ကိုယ့်ကွန်ပြူတာထဲမှာ ရှိနေတဲ့ Hardware တွေရဲ့ လက်ရှိ စွမ်းဆောင်နိုင်ရည်တွေကို တိုင်းတာ စစ်ဆေးပေးတဲ့ ညွှန်းကိန်းဖြစ်ပြီး Components ( ၅ ) မျိုးကို တိုင်းတာစစ်ဆေးပါတယ်။ အဲဒီ့ Components ( ၅ ) မျိုးကတော့ Processor - Memory ( RAM ) - Graphics - Gaming graphics - Primary hard disk တို့ ဖြစ်ပြီး တစ်ခုချင်းစီကနေ သူ စစ်ဆေးလို့ ရလာတဲ့ ကိန်းဂဏန်းတွေထဲက အငယ်ဆုံး ကိန်းဂဏန်းကို ယူပြီး Windows Experience Index Base Score ( ကွန်ပြူတာ၏ စွမ်းဆောင်ရည်ပြ အခြေခံညွှန်းကိန်း ) ကို ဖော်ပြပါတယ်။ ဒီဂဏန်းတွေ ဘာကို ရည်ညွှန်းသလဲ ဆိုရင် Subscore နိမ့်တာနဲ့ အမျှ ကိုယ့်ကွန်ပြူတာရဲ့ စွမ်းဆောင်နိုင်ရည်ဟာ သိသိသာသာ နှေးကွေးလေးလံမယ် ဆိုတာ ရည်ရွယ်တာဖြစ်ပြီး Subscore မြင့်တာ နဲ့ အမျှ ကွန်ပြူတာရဲ့ စွမ်းဆောင်ရည် မြန်ဆန်မြင့်မားမယ် ဆိုတာကို ဖော်ကျူးတာ ဖြစ်ပါတယ်။ - လို့ တစ်ချိန်က Windows Experience Index (WEI) အကြောင်းရေးရင်းနဲ့ Windows Experience Index: An In-Depth Look ဆိုတဲ့ ခေါင်းစဉ်အောက်မှာ ဖော်ပြခဲ့ဖူးပါတယ်။

ဝမ်းနည်းစရာ ကောင်းတာက End Users တိုင်းအတွက် အသုံးတည့်တဲ့ Windows Experience Index GUI version ဟာ Microsoft ကနေ နောက်ဆုံးထုတ်လိုက်တဲ့ Windows 8.1 OS မှာ ပါမလာတော့ဘူး။ WEI ဟာ အရင်က GUI version ဖြစ်တာကြောင့် အောက်မှာ မြင်ရတဲ့အတိုင်း သုံးရလွယ်တယ်။ ထင်သာမြင်သာရှိတယ်။

တစ်ခုရှိတာ Windows 8.1 မှာ WEI GUI version ပါမလာတော့ပေမယ့် Command Prompt နဲ့ Windows Powershell ကိုသုံးပြီး Command Line ကနေတဆင့် ကြည့်လို့တော့ ရနိုင်သေးတယ်။ ဒါပေမယ့် ခက်ခက်ခဲခဲတွေကို သိပ်စိတ်မဝင်စားတတ်တဲ့ သူတွေအတွက် WEI ကို Third-party tools တွေနဲ့ အရင် GUI version လိုပဲ သုံးလို့ရအောင် ဖန်တီးနိုင်ပါတယ်။ အောက်မှာ ဖော်ပြသွားမယ့် ခေါင်းစဉ်(၃)ခုက Windows 8.1 မှာ WEI ကို စစ်ဆေးကြည့်ချင်သူတွေအတွက် အသုံးပြုနိုင်မယ့် Tools တွေပါ။

Metro Experience Index : Windows 8.1 ရဲ့ WEI ကို စစ်ဆေးဖို့ ပထမဆုံးထွက်လာတဲ့ Tool တစ်ခုပါ။ Windows 8.1 Preview ထွက်ပြီးမကြာခင် လပိုင်းလောက်မှာ ထုတ်ခဲ့ပြီး ခုချိန်ထိ Update ထပ်မပေးတော့ပေမယ့် သူက Windows 8.1 RTM တင်မှာသာမက Windows 8.1 Update 1 ထိပါ ပြဿနာတစ်စုံတစ်ရာ မရှိပဲ အသုံးပြုနိုင်ပါတယ်။ တစ်ခုရှိတာ သူက Portable မဟုတ်လို့ Install လုပ်ဖို့ လိုပါလိမ့်မယ်။


ChrisPC Win Experience Index : သူက ကျွန်တော်တို့ အရင်သုံးနေကျ Original Windows Experience Index နဲ့ ဆင်တဲ့ Interface ရှိပြီး WEI scores မှာ CPU, RAM, Graphics, Hard Disk ဆိုတဲ့ Components တွေရဲ့ Subscore တွေကို ဖော်ပြပေးပါတယ်။


Winaero WEI Tool : ကျွန်တော့်တစ်ယောက်တည်း သဘောအရပြောရရင်တော့ ဖော်ပြမယ့် Tools (၃) မျိုးမှာ Winaero WEI Tool ကို သဘောအကျဆုံးပါ။ သူလည်းပဲ ChrisPC လို WEI scores မှာ CPU, RAM, Graphics, Hard Disk ဆိုတဲ့ Components တွေရဲ့ Subscore တွေကို ဖော်ပြပေးတယ်။ အဲ့တာအပြင် နောက်ထပ်ပါဝင်သေးတဲ့ သူရဲ့ အားသာချက်တစ်ချို့က -

ရလာတဲ့ Index ကို Screenshot တစ်ခါတည်း ယူလို့ရတယ်။
ရလာတဲ့ ပုံကို PNG File အနေနဲ့ Save လုပ်ပြီး ImgUr ကို တစ်ခါတည်း Upload တင်လို့ရတယ်။
နောက်ပြီး WEI Table ကို HTML File အနေနဲ့ Save လုပ်လို့ပါရတယ်။
နောက်ဆုံး အားသာချက်ကတော့ Install လုပ်ဖို့မလိုဘူး Portable အနေနဲ့ သုံးလို့ရတယ်။


စာဖတ်သူတွေအနေနဲ့ ဖော်ပြခဲ့တဲ့ WEI Tools (၃) ခုကို စမ်းသပ်သုံးစွဲကြည့်ပြီး နှစ်သက်ရာကို လိုအပ်နေသူတွေအတွက် လက်ဆင့်ကမ်းပေးကြဖို့ တိုက်တွန်းလိုပါတယ်။

TechSectors.

How To Make A Perfect Resume

ဒီဘက်ခေတ်မှာ လုပ်ငန်းခွင်ဝင်နေကြတဲ့ လူငယ်တိုင်း ကိုယ်ရေးအကျဉ်းဆိုတာနဲ့ ရင်းနှီးဖူးကြတယ်။ အလွယ်ပြောကြတာတော့ Resume ပေါ့။ ရင်းနှီးဖူးကြတယ်ဆိုပေမယ့် Resume ရဲ့ အရေးပါမှုကိုတော့ ဒီလောက်ကြီးထိ အသိအမှတ် မပြုကြသေးဘူး။ ဘာလို့လည်းဆိုတော့ အရင်တုန်းက ကျွန်တော်တို့နိုင်ငံမှာ Resume ထက် Background ကို ကြည့်ပြီး လက်ခံတာ ပိုများတယ်။ ပုဂ္ဂိုလ်ရေးအရ ရင်းနှီးကျွမ်းဝင်မှုရှိတာ၊ မကင်းရာမကင်းကြောင်း ပတ်သတ်နေတာ စသဖြင့် လုပ်ငန်းကျွမ်းကျင်မှုဆိုတာထက် Personal ပတ်သတ်မှုကို ပိုအရေးပေးပြီး အလုပ်ခန့်တတ်ကြတော့ Resume ဆိုတာ လုပ်ထုံးလုပ်နည်းအရ ထည့်ပေးရတဲ့သဘောမျိုး အနေနဲ့ပဲ ရှိခဲ့တယ်။
 
clip_image002
 
Photo >> http://www.careerigniter.com/

ဒါပေမယ့် ခုနောက်ပိုင်း ပွင့်လင်းမြင်သာတဲ့ ခေတ်ရောက်လာတော့ ရင်းနှီးကျွမ်းဝင်မှုကို အရင်ကလောက် ဦးစားမပေးတော့ဘူး။ အတွန်းအတိုက်များတဲ့ နည်းပညာခေတ်မှာ ပုဂ္ဂိုလ်ရေးရာ ရင်းနှီးကျွမ်းဝင်မှုက လုပ်ငန်းခွင် အရည်အသွေးနိမ့်ကျစေတတ်တာ ဘယ်သူမှ မငြင်းနိုင်တော့ဘူးလေ။ ကျွမ်းကျင်တာချင်းတူရင် မကင်းရာမကင်းကြောင်း ပတ်သတ်မှုကို ဦးစားပေးနိုင်တယ်ဆိုပေမယ့် အခြေခံအချက်က လုပ်ငန်းခွင် ကျွမ်းကျင်မှုဆိုတာကို ဦးစားပေးလာကြပြီ။ ဘယ်အလုပ်ပဲခေါ်ခေါ် Experience ဘယ်လောက်ရှိရမယ် ဆိုတာတွေတွေ့လာရပြီ။
 
လူတစ်ယောက် လုပ်ငန်းခွင်ကျွမ်းကျင်မှု ဘယ်လောက်ရှိတယ်၊ စီမံခန့်ခွဲနိုင်မှု ဘယ်လောက်ကောင်းတယ် ဆိုတာ တကယ်တော့ ချက်ချင်းဆုံးဖြတ်လို့ ရနိုင်တာမျိုး မဟုတ်ဘူး။ အဲ့တော့ အလုပ်လျှောက်လာသူတစ်ယောက်ရဲ့ အရည်အသွေးကို အမှန်ဆုံးမဟုတ်တောင် အနီးစပ်ဆုံး ခန့်မှန်းနိုင်ဖို့ လုပ်ငန်းရှင်တိုင်းက Resume ဆိုတာကို အလေးထားလာကြတယ်။ တစ်ဖက်မှာလည်း လုပ်ငန်းခွင်ဝင်မယ့် လူတစ်ယောက်အတွက် Resume တစ်ခုကို ကိုယ့်လုပ်ငန်းရှင် စိတ်ဝင်စားအောင်၊ ကိုယ့်ရဲ့ Ability ကို ထင်သာမြင်သာရှိအောင် တင်ပြတတ်ဖို့ လိုလာတယ်။
 
အဲ့တော့ လုပ်ငန်းခွင်ဝင်မယ့် လူငယ်တွေအတွက် လုပ်ငန်းရှင်တစ်ယောက်ရဲ့ အမြင်မှာ တင့်တယ်စေမယ့် Resume ကောင်းတစ်ခုဖြစ်အောင် ဘယ်လိုပြင်ဆင်ကြမလဲ။ လုပ်ငန်းကျွမ်းကျင်မှု အထိုက်လျောက်ပဲရှိပေမယ့် Impressive ဖြစ်စေမယ့် Resume ကောင်းတစ်ခု ဖန်တီးနိုင်ဖို့ ဘယ်ကနေစကြမလဲ။ 

Resume တစ်ခု ဖန်တီးတော့မယ်ဆိုရင် စိတ်ထဲရှိတာ အကြမ်းခြစ်ပြီး စာစီတာမျိုးထက် Resume တစ်ခုမှာပါသင့်တဲ့ အကြောင်းအရာတွေကို နဂိုတည်းက Format ချထားပြီးသား Resume Templates မျိုးတွေ သုံးစေချင်တယ်။ Resume Templates ကိုသုံးခြင်းအားဖြင့် အားသာချက်အနေနဲ့ Resume တစ်ခုစရေးဖို့ ဘယ်အချက်တွေကို အခြေခံရမလဲဆိုတာ ရှည်ရှည်ဝေးဝေး တွေးနေဖို့ မလိုတော့ဘူး။ ကိုယ့်ရဲ့ အရည်အသွေးကို တစ်ဖက်လူမြင်သာအောင် ဘယ်လိုရေးမလဲဆိုတဲ့ အချက်တစ်ခုတည်းကို အာရုံစိုက်ထားလို့ ရတယ်။
 
clip_image003
 
Resume လို့ ပြောလိုက်ရင် စာစီဖို့အတွက် Microsoft Word ကို အရင်ဆုံး ပြေးမြင်မိလိမ့်မယ်။ ပုံမှန် Computer သုံးတဲ့သူတစ်ယောက်အနေနဲ့ Professional-looking Resume ဖြစ်ဖို့ဆို Format ချနေတာနဲ့တင် အချိန်ကုန်နိုင်တယ်။ Office Web Apps မှာဆိုလည်း Resume Templates ပေးထားတယ်ဆိုပေမယ့် များများစားစား မရှိဘူး။ အဲ့တော့ Resume Templates ကို သုံးဖို့ဆိုရင် Microsoft Office ထက် Google Docs ကို သုံးစေချင်တယ်။ Google Docs Template Gallery မှာ အသင့်သုံးနိုင်တဲ့ Resume Templates တော်တော်များများ ရှိသလို Google Account တစ်ခုရှိယုံနဲ့ Search box မှာ Resume လို့ ရိုက်ပြီး အသင့်သုံး Resume Templates တွေတန်းသုံးနိုင်တယ်။
 
clip_image005
 
Resume Templates တွေများလို့ ရွေးရခက်နေရင် မသုံးသေးခင် Preview ကြည့်လို့ရတယ်။ Preview ကြည့်ခြင်းအားဖြင့် ကိုယ်လိုချင်တဲ့ အချက်တွေပါမပါ၊ ကိုယ်ရေးချင်တဲ့ Design မျိုးဟုတ်မဟုတ် တစ်ခါတည်း တန်းသိနိုင်တယ်။
 
clip_image006
 
စာသားတွေ ပြင်ချင်တာ၊ Font Size တွေ ပြောင်းချင်တာ၊ တစ်ခြားအကြောင်းအရာတွေ ဖြည့်ချင်တာ အားလုံးအတွက် Google Docs မှာ အကုန်အသင့်ရှိတယ်။
 
clip_image007
 
အကြောင်းအမျိုးမျိုးကြောင့် ချက်ချင်း မရေးချင်သေးဘူးဆိုရင် Resume Templates ကို ကိုယ့်စက်ထဲ Download ချထားပြီး နောက်မှ ရေးလို့ရတယ်။
 
clip_image008
 
နောက်ဆုံးတစ်ချက်ကတော့ Resume Templates ကို အသုံးချင်တဲ့ သူတွေအတွက် Internet ထဲမှာ Resume Builder ဆိုတာတွေလည်း ရှိသေးတယ်။ သူတို့တွေက Online Resume Builder တွေမို့လို့ တစ်ခြား ဘာမှမလိုဘူး။ ကိုယ့်ရဲ့ ကိုယ်ရေးအကျဉ်းကို သူပေးထားတဲ့ Templates တွေထဲက ကြိုက်ရာကိုရွေးပြီး သူမေးတဲ့ အချက်အလက်တွေ ဖြည့်လိုက်တာနဲ့ နောက်ဆုံးမှာ Resume တစ်ခါတည်း တန်းထုတ်ပေးတယ်။ စမ်းကြည့်ချင်ရင် အောက်မှာ Online Resume Builder ဖန်တီးပေးတဲ့ နေရာတစ်ချို့ ဖော်ပြထားပါတယ်-
ခုလောက်ဆိုရင် လုပ်ငန်းခွင်ဝင်မယ့် လူငယ်တွေအတွက် Resume တစ်ခုဖန်တီးဖို့ လိုအပ်မယ့် အခြေခံအချက်တွေ၊ အသုံးပြုနိုင်မယ့်နည်းလမ်းတွေ အတိုင်းအတာတစ်ခုထိ သိရှိနိုင်လိမ့်မယ်လို့ မျှော်လင့်မိပါတယ်။ ကျွမ်းကျင်ရာ အသက်မွေးဝမ်းကျောင်းမှုမှာ ပျော်ရွှင်စွာ ရပ်တည်နိုင်ကြပါစေ။
 
Maung Zin.

What You Should Do After Buying A New PC

PC တစ်လုံး ဆင်ပြီးသွားပြီဆိုရင် အရင်ဆုံး လုပ်ရမယ့် အရာတွေက Operating System တစ်ခုခု တင်ဖို့အတွက် ကြိုတင်ပြင်ဆင်မှု လုပ်ရပါမယ်။ 


(၁) Operating System ခွေ ကြိုတင်ရယူပါ။

OS တွေထဲမှာ လူသုံးများတာကတော့ Windows, Linux, Mac OSX, ... ဆိုတာတွေရှိတယ်။ တော်တော်များများကတော့ Windows သုံးကြတာများတယ်။ အဲ့တော့ ကိုယ့်စက်နဲ့ သင့်တော်မယ့် Windows အမျိုးအစား တစ်ခုခုကို စဉ်းစားပြီး တတ်နိုင်တယ်ဆိုရင်လည်း Windows ကို လိုင်စင်လေးနဲ့ ဝယ်သုံးပေါ့။ တကယ်လို့ မတတ်နိုင်ရင်လည်း Windows ခွေတွေကို Internet မှာ ကြိုက်သလို ဒေါင်းလုပ်ချလို့ရတယ်။ ဖိုရမ်မှာလည်း Operating Systems ဆိုတဲ့ ခေါင်းစဉ်အောက်မှာ သီးခြား တင်ပေးထားတာတွေ ရှိတယ်။ Intel i5 လို့ရေးထားတာတွေ့တော့ RAM တို့ HD တို့ Graphic တို့လည်း သိပ်နည်းမယ် မထင်ဘူး။ အဲ့တော့ WIndows 7 Ultimate ဖြစ်ဖြစ် Windows 8 Pro ဖြစ်ဖြစ် တင်ပေါ့။ Windows တင်နည်းတွေကတော့ အင်တာနက်ထဲမှာ လူတော်တော်များများ မြန်မာလိုရေးထားတာရှိတယ်။ PDF လုပ်ပြီး တင်ပေးထားတာတောင် မနည်းမနောပဲ။ ကျွန်တော်ရှာကြည့်တာ ဒီနေရာမှာ တင်ပေးထားတဲ့ Window XP, 7, 8 Installation လုပ်ပုံလုပ်နည်း စာအုပ်လေး မဆိုးဘူး။ Windows မျိုးစုံ တင်နည်းစာအုပ် (Windows Vista, XP, 7, 8) တွေလိုချင်ရင်တော့ ဒီနေရာမှာ ယူလို့ရတယ်။ တကယ်လို့ CD/DVD တွေနဲ့ မတင်ချင်တာပဲဖြစ်ဖြစ် ကိုယ့်စက်မှာ Drive မပါရင်ပဲ ဖြစ်ဖြစ် Windows Vista, 7, 8 ကို ဆော့ဝဲမသုံးပဲ USB ကနေ တင်လို့ရတယ်။ နည်းကို ဒီနေရာမှာ ဖတ်ကြည့်လိုက်ပါ။ Format ချနည်း Partition ပိုင်းနည်း သိချင်ရင်လည်း ဒီနေရာမှာ ရေးထားတာရှိတယ်။ အဲ့ဒီ Blogger ကိုလည်း ကျေးဇူးတင်ပါတယ်။ ကိုယ်တိုင်ဆို အဲ့တာတွေအားလုံး တစ်ထိုင်တည်း မရေးနိုင်ဘူး။ အခုတော့ အသင့်ခူးစားယုံလေးပဲ။ 

(၂) Driver ခွေ လက်ဝယ် ထားရှိပါ။ 

Windows တင်ပြီးပြီပဲ ဆိုကြပါစို့။ ကိုယ့်စက်မှာ တင်ထားတဲ့ Devices တွေနဲ့ OS နဲ့ သေချာချိတ်ဆက်ပြီး အလုပ်ကောင်းကောင်းလုပ်အောင် Drivers ဆိုတာ တင်ပေးရတယ်။ များသောအားဖြင့်တော့ PC ပဲဆင်ဆင် Laptop တို့ Notebook တို့ပဲ ဝယ်ဝယ် ဆိုင်တွေက Driver ခွေဆိုပြီး သီးသန့်ထည့်ပေးတတ်တယ်။ PC ဆင်ထားတဲ့ သူဆိုရင်တော့ Motherboard Driver ခွေနဲ့ Graphic Card တပ်ထားရင် Graphic Driver ခွေ အဓိကလိုတယ်။ Windows တင်ပြီးပြီဆိုရင် အဲ့ဒီ့ သက်ဆိုင်ရာ Driver တွေ သီးသန့်တင်ပေးရတယ်။ Windows 8 ဆိုရင်တော့ သိပ်မလိုဘူး။ Windows 7 ဆိုရင်တော့ Graphic Driver တင်ဖို့လိုကောင်းလိုတတ်တယ်။ Windows XP တင်ရင်တော့ အားလုံးနီးပါး တင်ပေးရတာများတယ်။ 

(၃) မိမိစက်တွင် အသုံးပြုမည့် Software များ ကြိုတင်စုဆောင်းပါ။ 

Windows ရော Drivers တွေရော တင်ပြီးပြီဆိုရင် ကိုယ့်စက်မှာသုံးမယ့် Software တွေ လက်ဝယ်အသင့်ရှိထားဖို့လိုတယ်။ မရှိသေးရင် ဆိုင်တွေမှာဝယ်လည်းရတယ်။ အင်တာနက်ကနေ ဒေါင်းလုပ်ချလည်းရတယ်။ အင်တာနက်ထဲမှာ ဆော့ဝဲလ်တွေ ဘယ်လိုရှာရလဲ ဆိုတာ အင်တာနက်အတွင်း Software ရှာဖွေခြင်း ဆိုပြီး ကျွန်တော်ရေးထားဖူးတာလည်း ရှိတယ်။ ကြိုက်တဲ့နည်းနဲ့ ကိုယ်သုံးမယ့် Software တွေ စုထားပါ။ မဟုတ်ရင် ဆိုင်သွားပြီး တင်ခိုင်းရင် ပိုက်ဆံထပ်ပေးနေရမယ်။ တချို့ဆိုင်တွေကတော့ ကွန်ပြူတာဝယ်ရင် Software အလကားထည့်ပေးတတ်တယ်။ 

အဲ့တာတွေအားလုံးပြီးရင်တော့ ကွန်ပြူတာ တစ်လုံး သုံးဖို့ အသင့်ဖြစ်ပါပြီ။

KznT.

.Net Framework feature and Windows 8

ကျွန်တော် တစ်လမှာ တစ်ရက်ပဲ အင်တာနက်သုံးဖို့ ကောင်းကောင်းအချိန်ရတယ် - အကြောင်းအရာသစ်တစ်ခု စဖွင့်ထားပြီး အရင်လို စာအများကြီး မရေးနိုင်တော့ စာဖတ်ချင်တဲ့ မိသားစုတွေကို အားနာမိတယ် - အများကြီး မဟုတ်ပေမယ့် ဒီနေ့လို သုံးဖြစ်တဲ့ရက်လေးမှာ ကျွန်တော် နည်းနည်းချင်း တတ်နိုင်သလောက် ကြိုးစားပြီး Sharing လုပ်ပေးသွားမှာပါ - တစ်ယောက်တည်းနဲ့ အများကြီး ရေးဖို့ မလွယ်သလို ဖတ်ဖို့လည်း မလွယ်တာမို့ ကိုg00gle တို့လို ကို kyawminkhoung တို့လို ကူညီပေးနိုင်မယ်ဆိုရင် အတိုင်းထက် အလွန်ပေါ့ဗျာ - ကျေးဇူးအများကြီး တင်ပါတယ် တကယ်ပါ။

Windows 8 ကို စသုံးတော့မယ်ဆိုရင် နောက်ထပ်ဖြစ်လာမယ့် ပြဿနာတစ်ခုက .net framework 3.5 ပြဿနာခင်ဗျ - Windows တင်ရတာ ဘာညာက Windows 7 နဲ့ ဘာမှ အများကြီး မကွာဘူး - Windows 7 တင်ပုံတင်နည်းကတော့ ကျွန်တော်တို့ ဖိုရမ်ထဲမှာလည်း ရေးထားပြီးသားမနည်းသလို - အင်တာနက်ထဲမှာလည်း စာအုပ်တွေမနည်းဘူး - အင်တာနက်ထဲ လိုက်ရှာဖတ်ရမှာ ပျင်းတယ်ဆိုရင်တောင် ရန်ကုန်မှာ နေတဲ့သူတွေ ပန်းဆိုးတန်းက စာအုပ်အရောင်းဆိုင်တွေမှာ WIndows 7 တင်နည်းရေးထားတဲ့ စာအုပ်လို့သာ မေးလိုက် - တစ်ပြုံကြီး ထုတ်ပြလိမ့်မယ်။ Windwows 8 က ပြောရရင် ကျွန်တော် တင်ဖူးသမျှ Windows တွေထဲမှာ အလွယ်ဆုံးလို့ထင်တာပဲ Drivers တွေဘာတွေလည်း ဘာမှ သိပ်ပြီး ပြဿနာမရှိဘူး - ဒါပေမယ့် အဓိကဖြစ်လာမယ့် ပြဿနာက တစ်ချို့ Apps တွေ - ဥပမာ Office 2010 လိုမျိုး - တင်ပြီးမှ Activate လုပ်ဖို့ Activator ကို Run တဲ့အခါ .net framework 3.5 ဆိုတဲ့ Windows Feature လိုပါတယ် - အဲ့တာကို Run ပါဆိုပြီး ပြဿနာ စပေးလိမ့်မယ် -

တကယ်တော့ Windows 8 မှာ .NET Framework 4.5 က တစ်ခါတည်း ထည့်ထားပေးပြီးသား - ဒါပေမယ့် တစ်ချို့ Programs တွေက အရင် Windows တွေမှာ သုံးဖို့အတွက် .Net Framework versions အဟောင်း တွေကို သုံးထားတာမျိုး ရှိတော့ Windows 8 မှာ ပုံမှန်အလုပ်မလုပ်နိုင်ပဲ အပေါ်မှာ ပြောထားသလို ပြဿနာပေးတတ်တယ် - အဲ့ချိန်ကျရင် .Net Framework versions အဟောင်းနဲ့ ရေးထားတဲ့ Programs တွေကို Windows 8 မှာ သုံးလို့ ရအောင် ကျွန်တော်တို့က Enable ပြန်လုပ်ပေးရတယ် - အဲ့လို Enable ပြန်လုပ်တဲ့နည်းက နည်းလမ်းနှစ်ခုရှိတယ် -
  • Online နဲ့ရှင်းတဲ့နည်း
  • Offline နည်း


ကျွန်တော်ကတော့ အချိန်တော်တော်များများ Offline နဲ့ ရှင်သန်ရတော့ Online နဲ့ ရှင်းတဲ့နည်းကို သိပ်မသုံးနိုင်ဘူး - တစ်ခုခု ပြဿနာဖြစ်ရင် Offline နဲ့ ရှင်းလို့ရမယ့်နည်းကိုပဲ အမြဲ လိုက်ရှာရတယ် - တကယ်လို့ မိသားစုဝင်တွေလည်း ခုလို ပြဿနာပေါ်နေပြီ ဆိုရင် အခုကျွန်တော် ပြောပြချင်တဲ့ နည်းနှစ်နည်းထဲက ကြိုက်တဲ့တစ်နည်းကို သုံးပြီး ရှင်းလို့ရတယ် - Online နဲ့ ဖြေရှင်းနည်းကိုတော့ ကျွန်တော် အသေးစိတ်အကျယ်ချဲ့ မရေးတော့ဘူး - သူက အရမ်းလည်းလွယ်သလို ပုံလေးတွေနဲ့ ရှင်းထားပြီးသားလည်းရှိတယ် - အောက်မှာ ဖော်ပြထားတဲ့ Link ကနေကြည့်ပါ။

How to Easily Install Previous Versions of the .Net Framework in Windows 8

တကယ်လို့ မိသားစုဝင်တွေက Online နဲ့ ချိတ်ပြီးလုပ်ဖို့ အဆင်မပြေဘူးဆိုရင် အခုအောက်မှာ ဖော်ပြမယ့်နည်းနဲ့ Offline ဖြေရှင်းလို့ ရပါတယ်။ အရင်ဆုံး ကျွန်တော်တို့ Windows 8 ရဲ့ Charms bar ကိုသွား "Search" Option ကနေတဆင့် အောက်ကပုံမှာ ဖော်ပြထားသလို cmd လို့ ရိုက်လိုက် -



ပြီးရင် တွေ့ရတဲ့ cmd icon ပေါ်မှာ Right click တစ်ချက်ပေး ပုံမှာပြထားတဲ့အတိုင်း "Run as Administrator" ကို click ပေး - Dialogue box တက်လာရင် Yes ပေး -



ဒါဆိုရင် Command line ကနေ စဖို့ အားလုံး အဆင်သင့်ဖြစ်ပါပြီ - ပြီးတာနဲ့ Windows 8 တင်တုန်းက သုံးတဲ့ Windows ခွေကို Drive ထဲ ပြန်ထည့်ပါ။ ပြီးသွားပြီ ဆိုတော့မှ အောက်မှာ ဖော်ပြထားတဲ့ Command ကို Copy > Paste > Enter လုပ်လိုက်ပါ -


dism.exe /online /enable-feature /featurename:NetFX3 /Source:H:\sources\sxs /LimitAccess

တစ်ခုရှိတာ ကျွန်တော် အနီနဲ့ ဖော်ပြထားတဲ့ H နေရာမှာ ကိုယ့်စက်က အခွေထည့်ထားတဲ့ Drive ရဲ့ Letter ဖြစ်မဖြစ် သေချာပြန်စစ်ပြီး လွဲနေရင် ကိုယ့်စက်က Drive ရဲ့ Letter ကို အစားပြင်ထည့်ပေးဖို့ လိ်ုပါတယ်။ အားလုံးအဆင်ပြေရင် သူက 60.4% လောက်မှာ ခဏကြာနေတတ်ပါတယ် - ၅ မိနစ် ၁၀ မိနစ်လောက်ပါ။ ပြီးရင်တော့ အောက်မှာ ပြထားသလို ၁၀ဝ% ဖြစ်သွားပါလိမ့်မယ်။



အားလုံးပြီးရင်တော့ စက်ထဲကို ဘာ Apps ပဲ သွင်းသွင်း ခုနကလို .net framework 3.5 ဆိုတဲ့ Windows Feature သွင်းဖို့ လိုပါတယ်ဆိုတဲ့ ပြဿနာမျိုး မတက်တော့ပဲ အဆင်ပြေတာ တွေ့ရပါလိမ့်မယ်။

KznT.

Bring the Start Menu Back in Windows 8


Windows 8 ကို စသုံးကြပြီ ဆိုတာနဲ့ ကျွန်တော်တို့ ပထမဆုံး ရင်ဆိုင်ရမယ့် ပြဿနာက Start Menu ပြဿနာပါ - ဘာကြောင့်လဲဆိုတော့ ဒီ Start Button ဆိုတာ ကျွန်တော်တို့နဲ့ ရင်းနှီးလာခဲ့တာ နှစ်ပေါင်း မနည်းတော့ဘူး - ကျွန်တော်တို့ အရင်အစဉ်အဆက် သုံးခဲ့တဲ့ Windows XP, Vista, 7 အားလုံးမှာ တရင်းတနှီး ဖြစ်ခဲ့ပြီးသား ဒီ button ကို Microsoft ကနေ Windows 8 မှာ ဖယ်ရှားပစ်လိုက်တယ် - Windows 8 ကို သုံးတာ နည်းနည်းကြာလာရင် Start Screen နဲ့ ရင်းနှီးသွားမှာမို့ ဒီ Button ကို အဲ့လောက် မတမ်းတတော့ပေမယ့် ခုမှ စသုံးမယ့် သူတစ်ယောက်အတွက် ဆိုရင်တော့ Start Button မရှိတဲ့ အခြေအနေက Windows 8 ကို ဘယ်လို Windows ကြီးလဲဆိုပြီး စိတ်ပျက်သွားစေနိုင်ပါတယ်။
အဲ့လို မဖြစ်ပါနဲ့ - ကျွန်တော်တို့မှာ အဖြေရှိပါတယ် - လက်ရှိ Windows 7 သုံးနေကြတဲ့သူတွေ - Start menu ကိုမှ တမ်းတမ်းစွဲ ဖြစ်နေသူတွေအတွက် Windows 8 မှာ Start menu ပြန်ရောက်လာအောင် လုပ်ဆောင်ပေးနိုင်မယ့် ရွေးချယ်စရာ programs တွေ မနည်းမနော ကျွန်တော်တို့မှာ ရှိပါတယ်။ အဲ့တာတွေအားလုံးထဲက ကောင်းနိုးရာရာ Apps သုံးမျိုးလောက် ကျွန်တော် အောက်မှာ မိတ်ဆက်ပေးပါ့မယ်။

Start8
 

သူကတော့ Windows 8 ကနေ ဖယ်ရှားခံလိုက်ရတဲ့ Start menu ကို အရင်အခြေအနေ အတိုင်း ပြန်ရောက်လာအောင် စွမ်းဆောင်ပေးနိုင်မယ့် program တစ်ခုပါ - Start8 ကို သုံးရင် Windows 8 မှာ မြင်ရမယ့် Start Menu Button ပုံစံက အထက်မှာ ပြထားတဲ့ ပုံစံအတိုင်းခပ်ပြားပြား ဖြစ်သွားပြီး မကြိုက်ရင် Windows 7 မှာတုန်းက သုံးခဲ့သလို အဝိုင်းပုံလည်း ပြန်ပြောင်းလို့ ရပါတယ် - ဒါတင်မက Windows 8 hot corners တို့ Charms bar တို့ကို Disable လုပ်ထားလို့ရသလို အရင် Windows တွေမှာတုန်းကလိုပဲ Sign in ဝင်တာနဲ့ Desktop ပေါ် တန်းရောက်အောင် စီစဉ်ထားလို့လည်းရပါတယ်။ Start8 နဲ့ ပတ်သတ်ပြီး ကျွန်တော်တို့အတွက် ခက်ခဲတဲ့ တစ်ချက်က သူက အလကားပေးမသုံးဘူး ၅ ဒေါ်လာပေးဝယ်ရမယ်။ Torrent မှာ ရှာကြည့်တော့ ဒီနေရာမှာ တွေ့တာ တစ်ခုရှိတယ်။ သုံးလို့ ရမယ်ထင်တယ်။ ကျွန်တော်က Upload တင်ပေးဖို့ ခက်တော့ လွယ်ကူသူတွေ ဒေါင်းပြီး မိသားစုဝင်တွေ သုံးနိုင်အောင် Upload လုပ်ပေးကြပါ။ အကြောင်းကြောင်းကြောင့် Start8 ကို မသုံးချင်ကြရင် နောက်ထပ် စမ်းသပ်ကြည့်နိုင်တာ Classic Shell ပါ။

Classic Shell


Classic Shell က ကျွန်တော့်စိတ်ထင် Start8 လောက်တော့ ကြည့်မကောင်းဘူး - ဒါပေမယ့် သူ့ရဲ့ အားသာချက်က open source program ဖြစ်ပြီး ကျွန်တော်တို့ တရားဝင် free သုံးလို့ရတယ် - သူလည်းပဲ Start8 လိုပဲ Windows 8 မှာ Start Menu Button ပြန်သုံးလို့ရအောင် လုပ်ပေးတယ် - စစချင်းသုံးတဲ့အချိန်မှာ သူ့ Start Button က Windows XP မှာ မြင်ရတဲ့ Start Button ပုံစံလိုမျိုး ခပ်တုန်းတုန်းကြီး ဖြစ်နေလိမ့်မယ် - ဒါပေမယ့် settings ထဲကို ဝင်ကြည့်ရင် တော်တော်များများကို အသေးစိတ်ပြင်နိုင်တာတွေ့ရပါလိမ့်မယ်။ Tweak လုပ်တာ ဝါသနာပါတဲ့ သူတစ်ယောက် ဖြစ်မယ်ဆိုရင်တော့ Classic Shell က သုံးဖို့ အဆင်ပြေမှာပါ။
StartMenu8

အပေါ်မှာ ကျွန်တော်ညွှန်းထားခဲ့ပြီးတဲ့ options နှစ်ခုထဲက တစ်ခုကိုမှ သဘောမကျဘူး ဆိုရင်တော့ ခုညွှန်းချင်တဲ့ StartMenu8 ကို စမ်းသပ်ကြည့်ပါ။ သူ့ကို သုံးမယ်ဆိုရင် အရင် Windows 7 မှာတုန်းက Start Menu Button ကျွန်တော်တို့ ပြန်ရမယ် - ဒါပေမယ့် သူ့မှာ ကြည့်ရနဲနဲဆိုးတဲ့ Send Feedback Button တစ်ခုပါတယ် - ဒါပေမယ့် ကိုယ့်အတွက် ဘာမှထိခိုက်လောက်တဲ့ ကိစ္စ မဟုတ်လို့ သုံးမယ်ဆိုရင် သုံးပျော်တယ်လို့ ဆိုရမှာပါ။

အနှစ်ချုပ် အနေနဲ့ ကျွန်တော့် အကြိုက်ဆုံးကို ပြောရမယ်ဆိုရင်တော့ Start8 ပါ - ခု အကြံပြုခဲ့တာတွေ တစ်ခုမှ မကြိုက်ခဲ့ရင်လည်း Internet ထဲမှာ Start menu replacements နဲ့ ပတ်သတ်ပြီး ပြင်ဆင်လို့ ရမယ့်နည်းလမ်းတွေ မနည်းမနော ရှိနေပါသေးတယ်။ လေ့လာကြည့်ပါ။ မတူတဲ့ အမြင်တွေ ရှိခဲ့မယ်ဆိုရင် ကျွန်တော်တို့ကို ပြန်လည်မျှဝေပေးပါ။

KznT.

Windows Experience Index: An In-Depth Look

Windows Experience Index အကြောင်းက တစ်ခါတုန်းကလည်း 2010 2011 Ultimate Software Guide for Windows Users အောက်မှာ ရေးပေးခဲ့ဖူးပါတယ် - တစ်ချို့ ဖတ်ဖြစ်တဲ့လူလည်း ရှိတယ် - တစ်ချို့ကလည်း စာဖတ်ဖို့ထက် Software လိုချင်စိတ်ပဲ များနေတာမို့ ကျော်ချသွားတဲ့လူတွေလည်း ရှိကောင်း ရှိလိမ့်မယ် - အဲ့တာကြောင့် ဒီအကြောင်းကိုပဲ နောက်ထပ်တစ်ခေါက် ထပ်ရေးဖြစ်လိုက်ပါတယ်။ ခုရေးမယ့် အကြောင်းအရာမှာတော့ နဲနဲ အသေးစိတ်ထားတယ် - Windows Experience Index အကြောင်း တစ်ခုတည်းတင် မဟုတ်ပဲ - သူ့ရဲ့ အားသာချက် အားနည်းချက်တွေ - လှည့်ကွင်း လှည့်ကွက်တွေနဲ့ သတိပြုသင့်တဲ့ အချက်တွေအကြောင်းပါ ထည့်သွင်းဆွေးနွေးသွားပါမယ်။

Windows Experience Index ဆိုသည်မှာ

Windows Experience Index ဆိုတာ Windows Vista နဲ့ 7 သုံးသူတွေ အတွက် Windows တင်အပြီးမှာ ကိုယ့်စက်ရဲ့ Performance ဘယ်လောက် ရှိနိုင်သလဲ ဆိုတာ စစ်ဆေးတဲ့ နေရာပါ - အလွယ်ပြောရရင် သူ့ကို Run လို့ ရလာတဲ့ Result ကို ကြည့်ပြီး - Performance အတွက် ဘာတွေ တိုးရမယ် - ဘာတွေချွေသုံးရမယ် - ဒီ Windows ကို ဆက်ပြီး သုံးသင့်သလား - မသုံးသင့်ဘူးလား - ဆိုတာမျိုးတွေထိ ခန့်မှန်းဆုံးဖြတ်နိုင်ပါတယ်။ Windows Vista နဲ့ Windows 7 Users တွေအတွက် Windows Experience Index ကို စစ်ဆေးရမယ့် နေရာက Control Panel \ Performance Information and Tools အောက်က Windows Experience Index Base Score နေရာမှာပါ။


Windows Experience Index အကြောင်းကို အသေးထပ်စိတ်ပြီး ရှင်းရရင် သူက ကိုယ့်ကွန်ပြူတာထဲမှာ ရှိနေတဲ့ Hardware နဲ့ Software တွေရဲ့ လက်ရှိ စွမ်းဆောင်နိုင်ရည်တွေကို တိုင်းတာ စစ်ဆေးပေးတဲ့ ညွှန်းကိန်းဖြစ်ပြီး Component ( ၅ ) မျိုးကို တိုင်းတာစစ်ဆေးပါတယ်။ အဲဒီ့ Component ( ၅ ) မျိုးကတော့ Processor - Memory ( RAM ) - Graphics - Gaming graphics - Primary hard disk တို့ ဖြစ်ပြီး တစ်ခုချင်းစီကနေ သူ စစ်ဆေးလို့ ရလာတဲ့ အထက်ဖော်ပြပါ ကိန်းဂဏန်းတွေထဲက အငယ်ဆုံး ကိန်းဂဏန်းကို ယူပြီး Windows Experience Index Base Score ( ကွန်ပြူတာ၏ စွမ်းဆောင်ရည်ပြ အခြေခံညွှန်းကိန်း ) ကို ဖော်ပြပါတယ်။ ဒီဂဏန်းတွေ ဘာကို ရည်ညွှန်းသလဲ ဆိုရင် Subscore နိမ့်တာနဲ့ အမျှ ကိုယ့်ကွန်ပြူတာရဲ့ စွမ်းဆောင်နိုင်ရည်ဟာ သိသိသာသာ နှေးကွေးလေးလံမယ် ဆိုတာ ရည်ရွယ်တာဖြစ်ပြီး Subscore မြင့်တာ နဲ့ အမျှ ကွန်ပြူတာရဲ့ စွမ်းဆောင်ရည် မြန်ဆန်မြင့်မားမယ် ဆိုတာကို ဖော်ကျူးတာ ဖြစ်ပါတယ်။ မိမိစက်မှာ ရှိတဲ့ Windows Experience Index Base Score ကို စစ်ဆေးဖို့ အတွက် ဖော်ပြပါ Update my score ကို click ပေးရပါမယ်။

ဖော်ပြပါ Hardware component တစ်ခုချင်းစီမှာ သီးခြား Subscore တစ်ခုစီရှိပြီး ကျွန်တော်တို့ ကွန်ပြူတာ ကွန်ပြူတာရဲ့ Windows Experience Index Base Score ဆိုတာ အဲ့ဒီ့ Hardware component တစ်ခုချင်းစီက ရလာတဲ့ Subscore အားလုံးထဲက အနိမ့်ဆုံး Subscore ကို ရွေးယူဖော်ပြတာဖြစ်ပါတယ်။ အထက်ဖော်ပြပါပုံမှာ ဆိုရင် ကျွန်တော့်ကွန်ပြူတာရဲ့ Subscore အနိမ့်ဆုံးဟာ 4.7 ဖြစ်တဲ့ အတွက်ကြောင့် ကျန်တဲ့ Components တွေ အားလုံးဟာ 5 ကျော် 6 ရပေမယ့် ကွန်ပြူတာရဲ့ Windows Experience Index Base Score မှာတော့ 4.7 ပဲ ဖြစ်သွားပါတယ်။ ( Base score ဟာ Components တွေ အားလုံးက ရလာတဲ့ subscore တွေအားလုံးကို ပေါင်းပြီး Average ရှာထားတာ မဟုတ်ပါဘူး။ ) ဒါကြောင့် ဆိုလိုတာ ကိုယ့်ကွန်ပြူတာမှာ Processor ဘယ်လောက်ကောင်းကောင်း RAM မကောင်းရင် - Hard disk မကောင်းရင် သို့တည်းမဟုတ် Graphics မကောင်းရင် Windows Experience Index က ကျနေမှာပဲ ဖြစ်ပါတယ်။ ဒါကြောင့် Windows Experience Index ကို ကြည့်ပြီး ကွန်ပြူတာတစ်လုံးရဲ့ စွမ်းဆောင်ရည် ဘယ်လောက်ထိ မြင့်မားတယ်ဆိုတာ အလွယ်နည်းနဲ့ စစ်ဆေးနိုင်ပါတယ်။ ထိုနည်း လည်းကောင်း ကိုယ့်ကွန်ပြူတာရဲ့ စွမ်းဆောင်ရည်ကို လက်ရှိအခြေအနေထက် မြှင့်ချင်ပြီဆိုရင်လည်း ဖော်ပြပါ Windows Experience Index မှာ ဖော်ပြထားတဲ့ Components တစ်ခုချင်းစီရဲ့ Subscore ကိုကြည့်ပြီး ဘယ် Components တွေကို မြှင့်ဖို့လိုမယ် ဆိုတာ အလွယ်တကူ ဆုံးဖြတ်နိုင်ပါတယ်။

အကြမ်းဖျဉ်းအားဖြင့် သုံးသပ်မယ် ဆိုရင် Windows Vista နဲ့ Windows 7 သုံးထားတဲ့ ကွန်ပြူတာတိုင်းဟာ အနိမ့်ဆုံး Windows Experience Index Base Score 3 နဲ့ 3 အထက် ( 4, 5 .... ) စသဖြင့် ရထားဖို့ လိုပြီး - 3 ထက် နိမ့်နေမယ် ဆိုရင်တော့ နိမ့်နေတဲ့ Hardware Components ကို အတတ်နိုင်ဆုံး မြှင့်တင်ဖို့လိုပါတယ်။ ဘာကြောင့်လည်း ဆိုရင် base score အနည်းဆုံး 3 ရထားတဲ့ ကွန်ပြူတာသာ Windows Vista - 7 မှာပါတဲ့ Windows Aero နဲ့ new features တွေကို Run နိုင်ဖို့ အခြေခံအား ဖြင့် ပြည့်စုံတယ်လို့ ဆိုနိုင်ပြီး base score 4 ဒါမှမဟုတ် 5 နဲ့ အထက် ရထားမှ new features အားလုံးကို စွမ်းအားပြည့် Run နိုင်မယ်လို့ အကြမ်းဖျဉ်းအားဖြင့် သုံးသပ်လို့ ရပါတယ်။ Windows Experience Index base score 3 အောက်ကို ရောက်နေမယ် ဆိုရင်တော့ Hardware Components ကို မြှင့်နိုင်ရင် မြှင့် မမြှင့်နိုင်ရင် Windows ပြောင်းသုံးဖို့ စဉ်းစားရပါ လိမ့်မယ်။ ပြောင်းသုံးဖို့ မစဉ်းစားပဲ ပေကပ်ပြီး သုံးမယ်ဆိုရင်တော့ မိမိအသုံးပြုတာ ကြမ်းရင် ကြမ်းသလို စက်မှာ ပြဿနာ တစ်ခုမဟုတ် ဖြစ်လာပါလိမ့်မယ်။

Windows Experience Index နှင့် မသမာမှုများအကြောင်း

အဲ့တော့ Windows Experience Index ရဲ့ သဘောကို အကြမ်းဖျဉ်းအားဖြင့် သိပြီ - သူ့ကို သိထားယုံနဲ့ ဘာတွေ ခန့်မှန်းနိုင်မယ် - ဘာတွေဆုံးဖြတ်နိုင်မယ် ဆိုတာ လူတော်တော်များများ သတိထားမိ လာကြတော့ နောက်ပိုင်းမှာ စက်တစ်ခုရဲ့ စွမ်းဆောင်ရည်ကို တစ်ယောက်နဲ့ တစ်ယောက် မေးကြရင် RAM ဘယ်လောက်လဲ - Processor ဘာလဲ - Graphic ဘယ်လိုလဲ ဆိုတာမျိုး တော်ယုံ ဘယ်သူမှ မမေးကြတော့ဘူး - ခင်ဗျားကွန်ပြူတာ Base score ဘယ်လောက်ရလဲ ဆိုတာမျိုးပဲ တိုက်ရိုက်ဦးတည် မေးကြတော့တယ် - ဒီတော့ Windows Experience Index ဆိုတာ ကွန်ပြူတာတစ်လုံးလုံးရဲ့ အသက်တစ်ခုလို တိုက်ရိုက် ပတ်သတ်လာတော့တာပေါ့ - ဒီအားသာချက်ကို သိလာတဲ့ လူတစ်ချို့က Windows Experience Index နဲ့ ပတ်သတ်ပြီး လှည့်ကွက်တစ်ချို့ လုပ်လာကြတယ် - ဆိုလိုတာ စက်တစ်လုံးရဲ့ Performance က တကယ်ဒီလောက် ကောင်းတာ မဟုတ်ပဲနဲ့ Subscore ကို မြင့်အောင် လုပ်လာကြတာမျိုးပေါ့ - တစ်ချို့ကတော့ ဒီလှည့်ကွက်ကို တစ်ယောက်နဲ့ တစ်ယောက် စနောက်ဖို့ အပျော်သဘောနဲ့ လုပ်ကြတယ် - တစ်ချို့ကတော့ မသိနားမလည်သူတွေကို ခုတုံးလုပ်ပြီး စီးပွားရေး အမြတ်ထုတ်ဖို့အတွက် လုပ်ဆောင်ကြတယ်။ ဒါ့ကြောင့် မိသားစုဝင်တွေအနေနဲ့ ကွန်ပြူတာတစ်လုံးကို ဝယ်ယူတော့မယ် ဆိုရင် အသစ်တစ်လုံး ဝယ်ယူရာမှာ ဖြစ်ဖြစ် - တစ်ခြား စက်အဟောင်းတစ်လုံးကို ဝယ်ယူရာမှာ ဖြစ်ဖြစ် စက်တစ်လုံးကို စစ်ဆေးတဲ့ နေရာမှာ Base score ကို စစ်ဆေးကြဖို့ - ရောင်းချသူရဲ့ ပါးစပ်က ထွက်တဲ့ Base score ကို မယုံကြဖို့ နဲ့ မျက်မြင်တွေ့ရယုံတင် မဟုတ်ပဲ ကိုယ်တိုင်ပါ စစ်ဆေးကြည့်ပြီးမှ ထွက်လာတဲ့ Base score ကို ယုံကြည်ကြဖို့ မှာချင်ပါတယ်။

Base score လှည့်ကွက်များအကြောင်း

ရောင်းချသူ / အသုံးပြုနေသူရဲ့ ကွန်ပြူတာဟာ Windows Vista / 7 တစ်ခုသုံးထားတယ်ဆိုရင် Performance ဘယ်လောက်ပဲ ရှိရှိ - အမြင့်ဆုံး Windows Experience Index 7.9 အထိ မြှင့်ယူလို့ ရပါတယ်။ အောက်ဖော်ပြပါ ပုံများကို ကြည့်ပါ - ခု အောက်မှာ မြင်ရတဲ့ပုံမှာ ကျွန်တော့်စက်မှာ ရှိနေတဲ့ Windows 7 Ultimate ရဲ့ Base score ဖြစ်ပါတယ်။ 4.7 ပါ။ ဒါဟာ Windows Experience Index ကို ဘာမှ ပြင်မယူရသေးခင် အဖြေအနေ ဖြစ်ပါတယ်။


ဒါကို တစ်ခြားသူတစ်ယောက်ကို ပြတဲ့နေရာမှာ မျက်နှာပန်းလှအောင် ကျွန်တော်ပြင်ယူလိုက်ပြီ - ခု အောက်မှာ ဖော်ပြထားတဲ့ ပုံကိုကြည့်ပါ။ အမြင့်ဆုံး Windows Experience Index 7.9 ကို ကျွန်တော့်စက်ရသွားပါပြီ။


အဲ့တော့ ပုံနှစ်ပုံရဲ့ ချက်ခြင်းဆိုသလို ကွာခြားသွားတဲ့ ပြောင်းလဲမှုကိုကြည့်ပြီး Windows Experience Index ရဲ့ Base Score ကို မြင်ယုံနဲ့ စက်တစ်လုံးရဲ့ Performance ကို ဆုံးဖြတ်ဖို့ စောလွန်းသွားပြီ ဆိုတာ သတိထားမိပါလိမ့်မယ်။ ဒီတော့ ကျွန်တော်တို့ ဘာလုပ်ကြမလဲ ??

Base score မြှင့်တင်မှု လမ်းကြောင်းများ

Performance မကောင်းလည်းပဲ Base score မြှင့်လို့ရတယ်ဆိုတာ ကျွန်တော်တို့ အပေါ်မှာ သိခဲ့ပြီ - အဲ့တော့ Subscore မြင့်လာအောင် ကျွန်တော်တို့ ဘယ်လို လုပ်ဆောင်လို့ ရမလဲ - Base score မြင့်လာအောင် လုပ်ဆောင်ရတဲ့ လမ်းကြောင်းက ခက်ခက်ခဲခဲ ရှုပ်ရှုပ်ရှက်ရှက် သိပ်မရှိပါဘူး - အောက်မှာ ဖော်ပြထားတဲ့ လမ်းကြောင်းအတိုင်း သွားပါ -

Quote:
C:\Windows\Performance\WinSAT\DataStore
DataStore ဆိုတဲ့ Folder အောက်ကို ရောက်ရင် အောက်ဖော်ပြပါအတိုင်း (date) Formal.Assessment (Initial).WinSAT.xml ဆိုတဲ့ တည်ဆောက်ပုံနဲ့ .xml ဖိုင်တစ်ခုတွေ့ပါလိမ့်မယ်။ အဲ့ဖိုင်ဟာ Windows Experience Index စာမျက်နှာမှာ ဖော်ပြနေတဲ့ Base score နဲ့ Subscore တွေ အားလုံးကို ချုပ်ထိန်းထားတဲ့ နေရာပါပဲ။


သူ့ကို ပြင်ဖို့အတွက် Right click ထောက်ပြီး WordPad နဲ့ ဖွင့်ပါ။ ပြီးရင် 4.7 ဆိုတဲ့ Code မျိုးနဲ့ ဆင်တူတဲ့ စာကြောင်းကို ရှာပါ။


ဒီနေရာမှာ 4.7 ဆိုတာ ကျွန်တော့်စက်ရဲ့ Base score ဖြစ်ပါတယ်။ ဒါကို ကိုယ့်စက်က Base score နဲ့ အစားသွင်းပြီး အောက်မှာ ဖော်ပြထားတဲ့ အတိုင်း Ctrl+F ကနေတစ်ဆင့် 4.9 ဆိုတဲ့ ပုံစံနဲ့လည်း ရှာနိုင်ပါတယ်။


ရှာလို့တွေ့ရင် လတ်တလော တွေ့နေရတဲ့ Current Rating ကို 7.9 ကို ပြောင်းပါ ( ဒါက ကျွန်တော် အကြမ်းဖျဉ်း ပြထားတာပါ - တကယ်တမ်း ယုတ္တိရှိဖို့ ဆိုရင် Base score ဟာ Subscore အနိမ့်ဆုံးနဲ့ ညီရမှာမို့လို့ လိုချင်တဲ့ Base score နဲ့ Subscore ကို ညှိထားတတ်ဖို့ လိုပါတယ်။ ) တကယ်လို့ Base Score တစ်ခုတည်းကို မဟုတ်ပဲ - ကျွန်တော် ပြောင်းပြထားသလို Subscore တွေအားလုံးကိုပါ ပြောင်းချင်သေးတယ် ဆိုရင် တစ်ခြား သက်ဆိုင်ရာ Components အားလုံးရဲ့ Subscore တွေကိုပါ လိုက်ရှာပြီး ပြောင်းပေးဖို့ လိုပါတယ်။ အားလုံးပြောင်းပြီးရင် Save လုပ်ပြီး Control panel အောက်က Windows Experience Index ကို သွားကြည့်ကြည့်ပါ - ကိုယ်ပြောင်းထားတဲ့ အတိုင်း ဖြစ်နေတာ တွေ့ရပါလိမ့်မယ်။


အဲ့တော့ ကျွန်တော်တို့တွေ Windows Experience Index ကို Fake Score ရအောင် ဘယ်လို လုပ်ရလဲ ဆိုတာ သိပြီ - သူများကိုယ့်ကို လှိမ့်လာရင် မခံရအောင်ရော ဘယ်လိုပြန်လုပ်ရမလဲ - အဲ့တာက လွယ်ပါတယ်။ အောက်ဖော်ပြပါ နေရာကနေ Windows Experience Index ကိုနောက်တစ်ကြိမ် ပြန် Run လိုက်ပါ - ရလဒ် အစစ်ပြန်ထွက်လာပါလိမ့်မယ်။


မှတ်ချက် - (date) Formal.Assessment (Initial).WinSAT.xml ဆိုတဲ့ ဖိုင်ကို Edit လုပ်တဲ့ နေရာမှာ အဲ့ဖိုင်ဟာ Windows file အမျိုးအစားထဲမှာ ပါတာမို့လို့ Edit လုပ်ပြီး Save လုပ်တဲ့ အချိန်မှာ Save လို့ မရတာမျိုး ဖြစ်တတ်ပါတယ်။ အဲ့လို အခြေအနေမှာ Ownership ယူဖို့ လိုပါတယ်။ အောက်မှာ ဖော်ပြထားတဲ့ ဖိုင်ကို Download ယူပါ - ရလာတဲ့အခါ အောက်ဖော်ပြပါ ဖိုင်ကို Run ပြီး Take Ownership Option ကို Right Click Menu မှာခေါ်ယူ သုံးစွဲနိုင်ပါတယ်။


Quote:
Add Take Ownership Option
http://www.mediafire.com/?6xysdx3nuzlv1fm
ခုဖော်ပြခဲ့သလောက်ဆို Windows Experience Index အကြောင်း အားသာချက် အားနည်းချက်တွေ - လှည့်ကွင်း လှည့်ကွက်တွေနဲ့ သတိပြုသင့်တဲ့ အချက်တွေအကြောင်း နားလည်နိုင်ကြလိမ့်မယ် ထင်ပါတယ်။ ခုဖော်ပြခဲ့တဲ့ ဖော်ပြချက်ဟာ တစ်ခြားသူတစ်ယောက်ရဲ့ မသိနားမလည်မှုကို အမြတ်ထုတ်ပြီး ကိုယ်ကျိုးရှာဖို့ ဖော်ပြထားတာ မဟုတ်ပါဘူး - မိသားစုဝင်များ ဗဟုသုတ ရှိစေဖို့နဲ့ ဖြစ်ပေါ်လာနိုင်တဲ့ အန္တရာယ်ကို ခန့်မှန်းနိုင်စေဖို့ပါ - အခြားလူတစ်ယောက် အခက်အခဲရှိနေရင်လည်း ကူညီပါ - မသိနားမလည်သူကို ဘာမှမခက်ခဲတဲ့ ပညာရပ်တစ်ခုနဲ့ ဆရာလုပ်ပြီး ပညာပြတဲ့သူဟာ တစ်သက်လုံး ဘာမှအဖြစ်မရှိတဲ့ ပညာရပ်နဲ့ပဲ အသက်မွေးရတတ်ပါတယ်။

KznT.

Best “Microsoft Fix it” Troubleshooters

Windows မှာ ပြဿနာ တစ်ခုခု တက်ရင် ဘာမှမလုပ်တတ်တဲ့ အခါ ဖိုရမ်ကိုပဲ ကျွန်တော်တို့ ပြေးကြရတယ် - ဒါပေမယ့် တစ်ချို့ပြဿနာတွေက ဖိုရမ်မှာ မေးမယ်ဆိုရင် ကိုယ်က အလျင်လိုနေပေမယ့် ချက်ချင်း အဖြေပြန်မရတတ်တာမျိုးတွေ ရှိတာမို့လို့ တတ်နိုင်မယ်ဆိုရင် ကျွန်တော့် အနေအနေနဲ့တော့ မမေးခင်မှာ ကိုယ်လိုချင်မယ့် အဖြေကို အင်တာနက်ထဲမှာ ရှိမရှိ အရင်ရှာကြစေချင်တယ် - ဒါမှလည်း နောက်ပိုင်း ပြဿနာတစ်ခုခု ဖြစ်တဲ့ အခါ ကိုယ်ကိုယ်တိုင် ဘာဖြစ်မယ် ဆိုတာ ခန့်မှန်းနိုင်ပြီး အင်တာနက်ထဲမှာလည်း ရှာဖွေတတ်လာမှာ - လောလောဆယ် ဒီ Thread ကို ရေးဖြစ်ရခြင်းရဲ့ အကြောင်းက Windows မှာ ဖြစ်တတ်တဲ့ ပြဿနာတွေ ( ဥပမာ - Windows Aero Glass visual effects အလုပ်မလုပ်တာ - Windows File and Folder တွေမှာ ပြဿနာ တက်နေတာကို ပြင်ချင်တာ - CD or DVD Drive တွေက ကောင်းပါရက်နဲ့ မရိုက်နိုင် မဖတ်နိုင် ဖြစ်နေတာ စသဖြင့် ပြဿနာ တက်နေတဲ့ အခါ ဖိုရမ်မှာ မေးစရာမလိုပဲ အတတ်နိုင်ဆုံး ပြေလည်နိုင်စေမယ့် နည်းလမ်းတစ်ခု ရှိနေတာကို မိသားစုဝင်များ သတိထားမိနိုင်အောင် ရေးသားလိုက်ခြင်း ဖြစ်ပါတယ်။ 

သူ့ရဲ့နာမည်ကတော့ Microsoft Fix it troubleshooters ပါ - တော်တော်များများလည်း သိပြီး ဖြစ်ပါလိမ့်မယ် - ဒါပေမယ့် တော်တော်များများ မသုံးဖြစ်ကြသေးဘူး - သူ့ရဲ့ စွမ်းဆောင်ရည်က ကိုယ့်စက်မှာ ဖြစ်နေတဲ့ ပြဿနာကို သူ့ဘာသာ အဖြေရှာပြီး သူ့အလိုလျောက်ပြင်ဆင်ပေးနိုင်တာ - ဒီနည်းကို ဘာကြောင့် သုံးစေချင်သလဲ ဆိုရင် Windows မှာ ပြဿနာ တစ်ခုခု ဖြစ်တဲ့ အခါ များသော အားဖြင့် ကျွန်တော်တို့ Windows Registryထဲထိ ဝင်ပြင်ကြရတယ် - Windows Registry ကို ဝင်ရောက် ပြင်ဆင်တာဟာ ပြင်ဆင်နေကျ လူတစ်ယောက်အတွက် Step by Step ဘယ်လို သွားရမယ် ဘာတွေ Backup လုပ်ရမယ်ဆိုတာ နားလည်ပေမယ့် လူသစ်တစ်ယောက်အတွက် သူများရေးတဲ့ စာကို ဖတ်ပြီး Windows Registry ကို ဝင်ပြင်တာဟာ အလွန်ကို အန္တရာယ်များပါတယ် - အဲ့တာကြောင့် ဖြစ်နိုင်မယ်ဆိုရင် Windows ပိုင်း ဆိုင်ရာမှာ ပြဿနာ တစ်ခုခု တက်တဲ့အခါ လူတော်တော်များများ လမ်းညွှန်လေ့ရှိတဲ့ Windows Registry ထဲကို ဝင်ပြင်တဲ့နည်းထက် Microsoft Fix it troubleshooters ကို အသုံးပြုစေချင်ပါတယ် - တကယ်လို့ Fix it troubleshooters သုံးလိုက်လို့မှ ဖြစ်တဲ့ ပြဿနာကို ဖြေရှင်းမပေးနိုင်ဘူး ဆိုရင်လည်း သူကနေ ဘာဆက်လုပ်ရမယ် ဆိုတာ ညွှန်ကြားပေးတတ်ပါတယ်။


လုပ်ဆောင်နည်းကတော့ အောက်မှာ ဖော်ပြပေးထားတဲ့ Mats_run.exe file တွေထဲက ကိုယ့်ပြဿနာနဲ့ အနီးစပ်ဆုံး ဆင်တူပြီး ဖြစ်နိုင်ချေရှိတဲ့ အမည်ကို ရွေးပြီး Download ချပါ - ပြီးရင် Run ပါ - အဲ့လို Run တဲ့ အချိန်မှာ အသုံးပြုနေတဲ့ ကွန်ပြူတာဟာ အင်တာနက်နဲ့ ချိတ်ဆက်ထားဖို့ လိုပါတယ် - ဒါမှ troubleshooter ဟာ ဖြစ်နေတဲ့ ပြဿနာကို ပြုပြင်ဖို့ အတွက် လိုအပ်တဲ့ Components တွေကို Download လုပ်ပြီး သုံးနိုင်မှာပါ - လိုအပ်တဲ့ အစိတ်အပိုင်းတွေကို Download လုပ်ပြီး သွားတာနဲ့ troubleshooter ကနေ ကိုယ့်စက်မှာ ဘာပြဿနာ ဖြစ်နေလဲဆိုတာ သူ့ဘာသာ စစ်ပြီး အလိုလျောက်ပြင်သွားပါလိမ့်မယ်။ တကယ်လို့ သူ မပြင်ပေးနိုင်ခဲ့ဘူး ဆိုရင်တောင် ဘယ်ကိုသွားပါ - ဘာကိုလုပ်ပါ ဆိုတာမျိုး ပြင်ဆင်ရေးအတွက် နေရာကောင်းတွေရှိမယ့် နေရာကို လမ်းညွှန်ပေးပါလိမ့်မယ်။


တကယ်လို့ ဒီနည်းကို မသုံးချင်ရင် နောက်ထပ်တစ်နည်း ရှိပါသေးတယ် - အဲ့တာကတော့ Fix it Solution Center ရဲ့ အကူအညီနဲ့ ဖြေရှင်းတဲ့ နည်းလမ်းပါ - Fix it Solution Center ရဲ့ အကူအညီကို ရယူနိုင်ဖို့ ဒီနေရာကနေ သွားပါ - ရောက်တဲ့ အချိန်မှာ အောက်ဖော်ပြပါအတိုင်း Options လေးတွေတွေ့ရပါလိမ့်မယ် - 




ကိုယ်ဖြစ်နေတဲ့ ပြဿနာရပ်ပေါ် မူတည်ပြီး Windows မှာဖြစ်တဲ့ ပြဿနာလား - Internet Explorer နဲ့ ပတ်သတ်ပြီး ဖြစ်တာလား - Windows Media Player နဲ့ ပတ်သတ်ပြီး ဖြစ်တာလား - စသဖြင့် ဆုံးဖြတ်ပြီး သက်ဆိုင်ရာ ခေါင်းစဉ် တစ်ခုခု အောက်ကို ဝင်ပါ - တကယ်လို့ ဘာနဲ့ ပတ်သတ်ပြီး ပြဿနာ ဖြစ်နေမှန်း ကိုယ်ကိုယ်တိုင် ဂဃနဏ မခွဲခြား တတ်ရင် များသောအားဖြင့် လူဖြစ်များတဲ့ ပြဿနာ ရပ်တွေဟာ Top Solutions အောက်မှာ ရှိနေတတ်ပါတယ်။ တကယ်တော့ ဒီအဆင့်က ကိုယ့် ဖြစ်နေတဲ့ ပြဿနာကို သူပေးထားတဲ့ Solutions တွေ အများကြီး ထဲက အနီးစပ်ဆုံး ရှာတွေ့နိုင်အောင် ဘောင်ချုံ့လိုက်တာ ဖြစ်ပါတယ် - နောက်တစ်ဆင့်မှာ ကိုယ်ဖြစ်တဲ့ ပြဿနာရဲ့ အနီးစပ်ဆုံး ဆင်တူတဲ့ ခေါင်းစဉ်ကို Select a problem area ကနေ ရွေးချယ်ပါ - 



အဲ့လို ရွေးချယ်လိုက်တာနဲ့ ပြဿနာ ဖြေရှင်းနိုင်မယ့် Solutions တွေကို အောက်မှာ Run Now နဲ့ ဖော်ပြသွားပါလိမ့်မယ် - အဲ့ထဲက အနီးစပ်ဆုံး အဖြေကို ထပ်ရှာပြီး Run Now နဲ့ ဖြေရှင်းလိုက်ယုံပါပဲ - 




တကယ်လို့ စိတ်ထဲမှာ ဒိွဟ ဖြစ်နေသေးရင် Run Now မနှိပ်ခင်မှာ Learn More ကို Click ပေးပြီး ကိုယ် Run Now လုပ်မယ့် ကောင်က ဘယ် ပြဿနာတွေကို ဖြေရှင်းပေးနိုင်မှာလဲ ဆိုတာ နောက်တစ်မျက်နှာမှာ အသေးစိတ်ဖတ်နိုင်ပါသေးတယ်။ အောက်မှာ ပုံစံတူ ဥပမာပြထားပါတယ်။



စမ်းသပ်ကြည့်ပါ - အဆင်ပြေခဲ့မယ် ဆိုရင် တစ်ခြားလူတစ်ယောက် ဖြေပေးတာ စောင့်ဖို့မလိုပဲ ကိုယ့်ပြဿနာ အမြန်ဆုံး ပြေလည်နိုင်တာပေါ့ 

ကိုးကားရင်းမြစ်များ

http://www.microsoft.com/downloads/e...1-5295789ec8fe
http://www.askvg.com/list-of-best-mi...r-pc-problems/
http://support.microsoft.com/fixit/
http://fixitcenter.support.microsoft.com/Portal

KznT.

Windows 8 And The Future Of Computing

စာမရေးတာ တစ်ပတ်လောက်ကြာသွားတော့ အကြောင်းအရာ ခပ်ကြီးကြီးရေးဖို့ ကျွန်တော်လည်း ပျင်းနေတယ် - ဒါပေမယ့် ပြန်အစပျိုးကြည့်ဦးမယ် - အရှိန်ပြန်ယူတဲ့ သဘောပေါ့ - ဒီနေ့ လူသိနည်းသေးတဲ့ အကြောင်းအရာလေး တစ်ခု ပြောပြချင်တယ် - Windows 8 အကြောင်းပေါ့ - Windows 8ဆိုပြီး အရင် Windows 7 ပေါ်ကာစတည်းက အခွေထွက် ဘာထွက်နဲ့ ထွက်လာတာတော့ ရှိတယ် - ဒါပေမယ့် အဲ့တာတွေက Windows 8 အစစ်မဟုတ်ဘူး - သူတို့က Windows 7 ပေါ်မှာ Based ယူပြီး Themes လေးတွေပြောင်း Tweaks လေးတွေလုပ်နဲ့ ပြောင်းလုပ်ထားတာ - ခု Windows 8 ကတော့ တကယ် အတည်လို ဖြစ်နေပြီ - ဒီ Windows 8 screenshots တွေ ပေါက်ကြားတယ် ဆိုပြီး ဓာတ်ပုံတွေနဲ့ ဘာတွေနဲ့ ထွက်လာတာ ကြာတာတော့ ကြာပြီ - ကျွန်တော်လည်း စစချင်း သိပ်တော့ မယုံဘူးဗျ - မယုံဘူး ဆိုတာကလည်း ဘယ်လိုပြောရမလဲ သတင်းကြီးချင်လို့ ချဲ့ကားရေးတယ်လို့ပဲ ထင်ထားတာ - ခုနောက်ပိုင်းကျတော့ ဒီ Windows 8 သတင်းက နာမည်ကြီး ဖိုရမ်တွေထိ တက်လာပြီ - ဒီတော့ မြန်မာမိသားစုဖိုရမ်မှာလည်း ရေးမှ ဖြစ်တော့မှပေါ့နော့် လောလောဆယ်အခြေအနေကတော့ Windows 8 က အတည်ထွက်တာမျိုး မဟုတ်သေးဘူး - Microsoft ကစမ်းသပ်ဆဲ ကာလ Pre-release သဘောပေါ့ - သူ့ရဲ့ UI ကို ကျွန်တော် သိထားသလောက် နည်းနည်းချင်း မိတ်ဆက်ပေးချင်တယ်။

Windows Aero

အရင်ဆုံး Microsoft က Windows 8 မှာ ပြောင်းလဲဖို့ လုပ်ထားတာ Windows Aero - အခု နောက်အသစ်ထွက်မယ့် Microsoft ရဲ့ Next OS Windows 8 မှာ Windows 8 rendering engine ကို ပြောင်းထားတယ်လို့ သိရတယ် - ဘယ်လို ပြောင်းတာမျိုးလဲ ဆိုရင် အရင် Desktop Window Manager က Hardware rendering ကို သုံးရာကနေ အခု Windows 8 မှာ Software rendering ကို ပြောင်းသုံးတယ် - ဒါကလည်း နည်းပညာစကားအရ ကွန်ပြူတာသမားတွေရဲ့ အသုံးအနှုန်းနဲ့ ပြောတာပါ - နားလည်လွယ်အောင် ပြောရရင်တော့ အရင်တုန်းကဆိုရင် ကျွန်တော်တို့ Windows 7 သုံးတဲ့ အခါ Windows Aero က Hardware မနိုင်ရင် သုံးလို့ မရဘူး - ကိုယ့် Graphic က ဘယ်လောက် စွမ်းဆောင်ရည်ကောင်းသလဲ ဆိုတာပေါ် မူတည်ပြီး Windows Aero က အရမ်းစကားပြောတယ် - အဲ့တော့ Hardware requirements လိုတဲ့ စက်တွေဆို Windows 7 သုံးမရ Windows Aero ကို Support မပေးတာတို့ ဖြစ်လာရော - ခု အဲ့ဒီ့ အားနည်းချက် Microsoft က သိပြီး Windows Aero ကို Hardware rendering ကနေ Software rendering ကို ပြောင်းလိုက်တယ် - ဆိုလိုတာက နောက်ဆို Hardware requirements ဘာမှ များများစားစား မလိုပဲ Windows Aero ကို သုံးလို့ ရမယ် ဆိုတဲ့ သဘောပေါ့ - အဲ့အချက်ကိုတော့ ကျွန်တော် အရမ်းသဘောကျတယ် - အောက်မှာကတော့ မြင်ရတဲ့ အတိုင်း Windows 8 Pre-realease ပါ -


Installation process

Windows 8 မှာ Installation process ကတော့ အရင်လို အဆင့်လိုက် တစ်ဆင့်ချင်း သွားနေတုန်းပဲ - ဒါပေမယ့် ခုလာမယ့် Windows 8 ရဲ့ Installation process မှာ အဆင့် တစ်ဆင့်ချင်းစီအလိုက် Users တွေ နားလည်လွယ်စေမယ့် ရှင်းလင်းချက်တွေ - Installation process ပြီးဖို့ ဘယ်လောက်ကြာဦးမယ် ဆိုတာတွေ အသေးစိတ် ပါလာမယ်လို့ သိရတယ်။


Windows Explorer Ribbon

ဒီအောက်မှာ မြင်ရမှာကတော့ Windows 8 မှာ ပြောင်းသွားမယ့် Windows Explorer Ribbon ပုံစံ - ထင်ရတာတော့ Windows 8 မှာ Microsoft က သူ့ Products အသီးသီးက features တွေကို တစ်နေရာတည်းမှာ Users တွေသုံးရလွယ်အောင် ပေါင်းပေးမယ့် သဘောမှာရှိတယ် - ကျွန်တော်တို့ သုံးနေကျ Total commander လို သဘောပေါ့ -


Improved Taskbar

အရင်တုန်းက ကျွန်တော်တို့ စက်မှာ New hardware တစ်ခုခု တက်လိုက်ရင် Windows က သူ့ဘာသာသူ ဘာတွေလုပ်နေမှန်း မသိဘူး - ပြီးခဏလောက်နေတော့မှ installed လုပ်ပြီးပြီ အသင့်သုံးလို့ ရပြီ ဆိုပြီး ပြတယ် - တစ်ခါတစ်လေဆိုရင်လည်း installed လုပ်လို့ မရ သုံးလို့ မရဆိုပြီး ပြတတ်တယ် - ခု Windows 8 မှာ အဲ့လို မဟုတ်တော့ဘူး New hardware တစ်ခုခုကို install လုပ်နေတယ်ဆိုရင်လည်း Taskbar မှာ Progress indicators တြွေပပေးလာမယ် -


Live ID integration

နောက်ပြီး Windows 8 မှာ Live ID integration ပါလာမယ် - ကိုယ့်ရဲ့ Live ID က တင်ထားတဲ့ ပုံကို Taskbar မှာ ပြပေးမှာမျိုးပေ့ါ


System reset feature

နောက်တစ်ခု Windows 8 မှာ ထူးခြားလာတာ System reset feature - သူ့ကြောင့် ဘာကောင်းကျိုး ရလာလဲ ဆိုရင် ကိုယ့်ကွန်ပြူတာ တစ်ခုခု ပြဿနာတက်လို့ သုံးရတာ အဆင်မပြေဖြစ်လာတဲ့ အခါ OS တစ်ခုလုံးကို မိနစ်ပိုင်းအတွင်း အောက်မှာ ဖော်ပြထားတဲ့ အတိုင်း restore ပြန်ပေးလိုက်လို့ ရလာမယ် - End users တွေအတွက် အများကြီး အဆင်ပြေတာပေါ့ - အောက်မှာ မြင်ရတဲ့ အတိုင်း 'Restore to the original factory settings' ဆိုတာကို သုံးလိုက်ရင် စက်ထဲမှာ သွင်းထားသမျှ Programs တွေအားလုံးကို Remove လုပ်ပြီး ကိုယ့် OS ကို Default settings အတိုင်း ပြန်ဖြစ်သွားစေမှာပါ - Windows အသစ်တင်ပြီး ခါစလိုပေါ့ 


Modern Reader

နောက်ထပ် ပြင်ဆင်ထားတဲ့ တစ်ချက်က Modern Reader - အရင်ကဆို Windows မှာ PDF files တွေ ဖတ်ဖို့အတွက် သီးသန့် Foxit တို့ Adobe acrobat တို့ ဆိုတာမျိုးတွေ တင်ရတယ် - ခုတော့ Windows 8 မှာ Modern Reader တစ်ခု ပါလာမယ် - မြင်ရမယ့် ပုံစံကတော့ ခုလိုမျိုး -


Internet Explorer Immersive UI

နောက်ပြီး ခုနောက်ပိုင်း လူသုံးများလာတဲ့ tablets လိုမျိုး touch-based devices တွေအတွက်လည်း Microsoft က dual interface design ထည့်ပေးနိုင်ဖို့ ပြင်ဆင်ပေးထားတယ် - အောက်မှာ Internet Explorer 9 ရဲ့ New Immersive version ကို မြင်နိုင်ပါတယ်။


Aero Auto-Colorization

ပြောစရာတွေကလည်း မကုန်နိုင်တော့ဘူး ဖြစ်နေတယ် - နောက်ထပ် Windows 8 မှာ ပြောင်းလဲမှု လုပ်ထားတစ်ခုက Aero Auto-Colorization - နားလည်လွယ်အောင် ပြောရရင် Desktop background ရဲ့ Colour အချိန်းအပြောင်းပေါ် မူတည်ပြီး Start Menu - Windows Explorer နဲ့ Taskbar တွေအားလုံးက နောက်ခံ background အရောင်နဲ့ ဟပ်မိအောင် Colour တွေ လိုက်ပြောင်းပေးမယ့် ပြင်ဆင်မှု အသစ်ပေါ့ - အောက်က ပုံတြွေကည့်ရင် နားလည်ပါလိမ့်မယ်။




SmartScreen Filter

သူလည်း Windows 8 မှာ ပါလာတ့ဲ ထပ်ပေါင်းဖြည့်ပေးလာတဲ့ Features အသစ် - အရင် ကျွန်တော်တို့ Internet Explorer 8 မှာတုန်းက Microsoft ကနေပြီး Malware ရန်ကနေ ကာကွယ်နိုင်အောင် browser ထဲမှာ SmartScreen Filter ဆိုတာ ထည့်ပေးလိုက်တယ် - သူ့သဘောက browser ကနေ ဖိုင်တစ်ခုခုကို ဒေါင်းလုပ်ချလိုက်တာနဲ့ ကိုယ်ဒေါင်းလုပ်ချနေတဲ့ Websites ရယ် - Download ချနေတဲ့ ဖိုင်အမျိုးအစားရယ်ကို ကြည့်ပြီး Malware ရန်ကနေ ကာကွယ်ပေးတယ် - ခု အဲ့ဒီ့ SmartScreen Filter ကိုပဲ Wndows 8 မှာ built-in ထပ်ထည့်ပေးလာတယ် - သဘောက ဖိုင်တစ်ခုခုကို ဒေါင်းလုပ်ချပြီး run ဖို့ လုပ်တာနဲ့ file system ကို စစ်မယ် - malicious လား ခန့်မှန်းမယ် - အမည်မသိဆိုရင် block မယ် အဲ့လိုမျိုးပေါ့ -


Windows 8 Welcome screen

နောက်ဆုံး တစ်ခု ပြောဖို့ကျန်တာကတော့ Windows 8 Welcome screen - Windows Phone 7 lock screen ပုံစံမျိုး သူက အခြေပြုပြီး ဖန်တီးထားတယ် - ပုံကြီးကြည့်ပြီးတော့ စိတ်မပျက်သွားပါနဲ့ဦး  အဲ့တာက Background change လို့ ရပါတယ် - ထူးခြားသွားတာက နေ့- လ - ရက် အချိန်တွေ ပြပေးလာတာ -


ဒါတွေက အကုန်အသေးစိတ် မဟုတ်ပါဘူး - ကျွန်တော် ဖတ်ထားသလောက် အားလုံး ခြုံပြီး မိတ်ဆက်ပေးတာပါ - အသေးစိတ်လေ့လာဖတ်ရှုချင်သူများ အောက်မှာ ဖော်ပြထားတဲ့ Links များကနေ ဆက်ပြီး လေ့လာနိုင်ပါတယ်။ ပုံတွေအားလုံးကိုလည်း ဖော်ပြပါ ဆိုဒ်တွေကနေ ယူသုံးထားပါတယ်။

မူလရင်းမြစ်များ

http://www.winbeta.org/?q=news/what-...bout-windows-8
http://www.winbeta.org/?q=news/windo...tem-protection
http://www.winbeta.org/?q=news/windo...r-immersive-ui
http://windows8beta.com/2011/04/smar...g-in-windows-8
http://www.winbeta.org/?q=news/leake...proved-taskbar
http://www.withinwindows.com/2011/04...-colorization/
http://www.withinwindows.com/2011/04...modern-reader/
http://www.withinwindows.com/2011/04...rer-immersive/
http://www.withinwindows.com/2011/04...plorer-ribbon/
http://www.withinwindows.com/2011/04...elcome-screen/

လေ့လာနိုင်သမျှ မျှဝေနိုင်ကြပါစေ

KznT.

Related Posts